کابل – د افغانستان د ولسي جرګې پخوانۍ غړې فوزیه کوفی د پاکستان له لوري پر افغان خاورې د ترسره شويو هوايي بریدونو په غبرګون کې دغه بریدونه په کلکه وغندل

کابل – د افغانستان د ولسي جرګې پخوانۍ غړې فوزیه کوفی د پاکستان له لوري پر افغان خاورې د ترسره شويو هوايي بریدونو په غبرګون کې دغه بریدونه په کلکه وغندل

بریانیوز:(دوشنبه،۴ حوت۱۴۰۴) 

کابل – د افغانستان د ولسي جرګې پخوانۍ غړې فوزیه کوفی د پاکستان له لوري پر افغان خاورې د ترسره شويو هوايي بریدونو په غبرګون کې دغه بریدونه په کلکه وغندل او دا یې د ملي حاکمیت ښکاره نقض وباله

کوفی په خپلې ټولنیزې شبکې «ایکس» کې په خپره کړې یادونه کې لیکلي چې د افغانستان پر خاوره هر ډول پوځي اقدام د نړیوالو اصولو او د هېواد د خپلواکۍ خلاف دی. هغې ټینګار کړی چې د دوامدارې سولې لپاره تر ټولو اساسي شرط د داسې نظام رامنځته کېدل دي چې د خلکو له ارادې سرچینه واخلي او پراخ مشروعیت ولري

د مشروع نظام اړتیا

د هغې په وینا، یو داسې حکومت چې ولسي ملاتړ ونه لري، نه شي کولای د تلپاتې سولې لپاره لازم بنسټونه برابر کړي. کوفی اوسنی حاکم نظام د پراخ ولسي ملاتړ څخه بې‌برخې بللی او ویلي یې دي چې مشروعیت، شمولیت او د اساسي قانون په چوکاټ کې حاکمیت هغه عناصر دي چې د افغانستان او سیمې د سولې د خوندیتوب تضمین کوي

نوموړې زیاته کړې چې که په هېواد کې یو پراخ‌بنسټه، قانوني او ټولشموله نظام جوړ شي، نو هم به د کورنیو شخړو زمینه کمه شي او هم به د بهرنیو لاسوهنو مخه ونیول شي

د افراطي ډلو په اړه خبرداری

فوزیه کوفی ټینګار کړی چې افغانستان باید هېڅکله د نیابتي جګړو او افراطي ډلو لپاره په خوندي پناه‌ځای بدل نه شي. هغې ویلي چې د داسې ډلو شتون نه یوازې د افغانستان امنیت ته ګواښ دی، بلکې ټوله سیمه له بې‌ثباتۍ سره مخ کوي

سیمه‌ ییز اغېز

د شنونکو په باور، د افغان سیاستوالو له لوري د ملي حاکمیت پر موضوع ټینګار ښيي چې د سیمې وروستي امنیتي تحولات د پراخې اندېښنې سبب شوي دي. دوی وایي، که د سولې لپاره مشروع او ټولشموله سیاسي جوړښت رامنځته نه شي، نو افغانستان به د سیمه‌ییزو سیالیو ډګر پاتې شي

د کوفی وروستۍ څرګندونې په داسې وخت کې خپرې شوې دي چې د افغانستان پر وضعیت او د سیمې پر امنیتي معادلو بحثونه تود شوي دي، او ګڼ سیاسي څېرې د ملي اجماع او قانوني چوکاټ د رامنځته کېدو غوښتنه کوي