زلمی خلیلزاد د پاکستان هوايي بریدونه په کلکه وغندل؛ وايي د ملکي وګړو مرګ‌ ژوبله به د کړکېچ لمن نوره هم پراخه کړي

زلمی خلیلزاد د پاکستان هوايي بریدونه په کلکه وغندل؛ وايي د ملکي وګړو مرګ‌ ژوبله به د کړکېچ لمن نوره هم پراخه کړي

بریانیوز:(شنبه،۲۳ حوت۱۴۰۴)

د افغانستان د سولې لپاره د د امریکا متحده ایالات پخواني ځانګړي استازي زلمي خلیلزاد د پاکستان وروستي هوايي بریدونه په کلکو ټکو غندلي او ویلي یې دي چې دغه بریدونه په افغانستان کې د ملکي وګړو د مرګ‌ژوبلې لامل شوي دي

خلیلزاد دا څرګندونې په خپله د  پاڼه کې کړې دي. نوموړي لیکلي چې د پاکستان له لوري ترسره شويو هوايي بریدونو نه یوازې ملکي وګړي زیانمن کړي، بلکې د افغانستان د خصوصي هوايي شرکت کام ایر د سون توکو یوه مهمه زېرمه هم ویجاړه شوې ده. د هغه په وینا، دا ډول بریدونه نه یوازې اقتصادي زیانونه رامنځته کوي، بلکې د عامو خلکو ژوند او معیشت هم له جدي ګواښ سره مخ کوي

خلیلزاد ټینګار کړی چې دا اقدام د منلو وړ نه دی او ښايي برعکس پایلې ولري. د هغه په وینا، داسې پوځي ګامونه کولی شي د افغانستان او پاکستان ترمنځ تاوتریخوالی نور هم زیات کړي او د دواړو هېوادونو ترمنځ سیاسي او امنیتي اړیکې لا پسې ترینګلې کړي

نوموړي همداراز له اسلام‌اباد څخه غوښتي چې ژر تر ژره د تاوتریخوالي د کمولو لپاره عملي ګامونه پورته کړي او د ستونزو د حل لپاره د خبرو اترو او ډیپلوماتیکو لارو کار واخلي. د هغه په خبره، د زور کارول هېڅکله د اوږدمهاله حل لاره نه شي کېدای

خلیلزاد خبرداری ورکړی چې که دا حالت دوام پیدا کړي، ښايي افغانان غبرګون وښيي او دا کار به د دواړو هېوادونو ترمنځ کړکېچ نور هم ژور کړي. هغه ویلي چې د تاوتریخوالي دوام به تر ټولو زیات زیان عامو خلکو ته ورسوي او د دواړو لورو د خلکو کړاوونه به زیات کړي

شنونکي هم باور لري چې د افغانستان او پاکستان ترمنځ وروستي امنیتي کړکېچونه د سیمې د ثبات لپاره جدي اندېښنې رامنځته کړې دي. د دوی په وینا، که دواړه هېوادونه د خبرو اترو او تفاهم لاره خپله نه کړي، نو ښايي دا کړکېچ نور هم پراخ شي او د سیمې پر امنیت او اقتصاد اوږدمهاله اغېزې پرېږدي