کازان کې د افغانستان او روسیې د اقتصادي همکارۍ نوې څپه؛ د ګډ کمېسیون لومړنۍغونډه ترسره شوه

 کازان کې د افغانستان او روسیې د اقتصادي همکارۍ نوې څپه؛ د ګډ کمېسیون لومړنۍ غونډه ترسره شوه

بریا نیوز (پنـجـــه شنبه،۲۳ثور ۱۴۰۵)

د لوړو زده کړو وزارت ویلي، د «روسیې او اسلامي نړۍ» اوولسمې نړیوالې غونډې په څنډه کې د افغانستان او روسیه ترمنځ د ګډ اقتصادي او سوداګریز کمېسیون لومړنۍ غونډه د کازان په ښار کې ترسره شوې ده

د یاد وزارت په خپره شوې خبرپاڼه کې راغلي چې په دې مهمه غونډه کې د دواړو هېوادونو ترمنځ د اقتصادي اړیکو د پراختیا، سوداګریزو همکاریو، ټرانزیټي اسانتیاوو او افغانستان ته د پانګونې د راجلبولو پر لارو چارو هر اړخیزې خبرې شوې دي

د غونډې ګډونوالو کې د اسلامي امارت د بېلابېلو وزارتونو استازي، د روسیې د صنعت او سوداګرۍ وزارت مرستیال، او همداراز د دواړو هېوادونو سفیران شامل وو، چې د دوه اړخیزو اړیکو د پیاوړتیا لپاره یې د عملي ګامونو پر اړتیا ټینګار وکړ

د شیخ ندا محمد ندیم په وینا، افغانستان هڅه کوي له نړۍ سره متوازن، مثبت او رغنده تعامل ولري او غواړي خپلې اقتصادي اړیکې د متقابل احترام او ګډو ګټو پر بنسټ پراخې کړي

هغه زیاته کړې، افغانستان د خپل مهم جغرافیایي موقعیت له امله کولای شي د مرکزي اسیا او سویلي اسیا ترمنځ د اقتصادي دهلېز او نښلونکې کړۍ مهم رول ولوبوي. د نوموړي په خبره، د ټرانزیټ، سوداګرۍ او سیمه‌ییز اتصال پراختیا نه یوازې افغانستان، بلکې ټولې سیمې ته اقتصادي فرصتونه رامنځته کولای شي

شنونکي وایي، په وروستیو کلونو کې د روسیې او افغانستان ترمنځ اقتصادي او سوداګریز تماسونه زیات شوي او دواړه لوري هڅه کوي د انرژۍ، ټرانسپورټ، کانونو او سوداګرۍ په برخو کې خپلې همکارۍ پراخې کړي

د سیمې د چارو کارپوهان باور لري چې د کازان دا غونډه ښايي د افغانستان او روسیې ترمنځ د اقتصادي اړیکو د نوي پړاو پیل وګرځي؛ هغه اړیکې چې کولی شي د سیمه‌ییز اتصال، سوداګریزې ودې او اقتصادي ثبات لپاره نوې دروازې پرانیزي