د ایران سره د احتمالي تړون خبرې؛ روبیو وایي معامله کېدای شي څو ورځې نور هم ونیسي

د ایران سره د احتمالي تړون خبرې؛ روبیو وایي معامله کېدای شي څو ورځې نور هم ونیسي

بریا نیوز (سه شنبه ،۵جوزا، ۱۴۰۵)

د امریکا د بهرنیو چارو وزیر مارکو روبیو ویلي چې د ایران سره د یوې احتمالي هوکړې خبرې ممکن “څو ورځې نور هم وخت ونیسي”، په داسې حال کې چې د سیمې کړکېچ د تازه پوځي اقداماتو او سیاسي فشارونو له امله لا پسې زیات شوی دی

روبیو دا څرګندونې د سه‌شنبې په ورځ وکړې او ټینګار یې وکړ چې که څه هم خبرې روانې دي، خو د سمدستي پایلې تمه نه شي کېدای. د هغه په وینا، د ایران سره د معاملې مسیر لا هم د بحث لاندې دی او د تړون د متن او شرایطو په اړه جدي خبرې روانې دي

دغه څرګندونې تر هغې وروسته مخې ته راځي چې امریکایي ځواکونو په جنوبي ایران کې هغه بریدونه ترسره کړل چې واشنګټن یې “د دفاعي اقدام” په توګه یادوي. د راپورونو له مخې، په دې بریدونو کې د توغندیو د توغولو ځایونه او هغه کښتۍ په نښه شوې چې د ماین ایښودلو په فعالیتونو کې ښکېلې بلل شوې وې

روبیو په خپلو خبرو کې د هرمز تنګي موضوع هم یو ځل بیا مهمه وبلله او ویې ویل چې دا ستراتیژیکه او نړیواله سوداګریزه لار باید په هر قیمت پرانیستې پاتې شي. هغه زیاته کړه چې د نړۍ د انرژۍ د لېږد لپاره د دې لارې بندېدل د منلو وړ نه دي

په همدې حال کې، د ډیپلوماتیکو سرچینو له مخې، د ایران او امریکا ترمنځ خبرې په دوحه کې هم روانې دي، چې تمرکز یې د هرمز تنګي د وضعیت، د ایران د یورانیمو زېرمو او د بندو مالي شتمنیو پر موضوعاتو دی

شنونکي وایي، که څه هم خبرې روانې دي، خو د پوځي کړکېچ او سیاسي اختلافونو له امله لا هم د بې باورۍ فضا حاکمه ده

سیاسي شنونکي باور لري چې د روبیو وروستۍ څرګندونې د دې ښکارندويي کوي چې واشنګټن غواړي هم له ډیپلوماسۍ کار واخلي او هم په عین حال کې د فشار سیاست وساتي د دوی په وینا، دا ډول دوه ګونی تګلاره د سیمې وضعیت لا پېچلی کوي او د یوې نهایي هوکړې وخت نامعلوم ساتي

په ټوله کې، د ایران او امریکا ترمنځ وضعیت اوس د حساسو پړاوونو په درشل کې دی؛ له یوې خوا پوځي فعالیتونه دوام لري او له بلې خوا د سولې او هوکړې خبرې هم پر مخ روانې دي، خو لا هم د یوې وروستۍ پایلې لپاره څو ورځې او حتی اوږد انتظار ته اړتیا لیدل کېږي