پریټوریا : رامافوسا له ملالې او افغان ښځینه فعالانو سره وکتل؛ د جنسیتي اپارتاید پر وړاندې د ملاتړ غوښتنه

پریټوریا : رامافوسا له ملالې او افغان ښځینه فعالانو سره وکتل؛ د جنسیتي اپارتاید پر وړاندې د ملاتړ غوښتنه

 بریانیوز/ دوشنبه ( ۱۹ / اسد /۱۴۰۵هـ.ش)

 د سوېلي افریقا ولسمشر سیریل رامافوسا د نجونو د زده‌کړو له فعالې ملالې یوسفزۍ او یو شمېر افغان ښځینه فعالانو سره کتلي دي. په دې لیدنه کې افغان ښځینه فعالانو له سوېلي افریقا وغوښتل چې په افغانستان کې د جنسیتي اپارتاید پر وړاندې د دوی له مبارزې ملاتړ وکړي

په دغه کتنه کې د افغانستان د ښځو او نجونو پر وړاندې د لګېدلو محدودیتونو، د هغوی د حقونو د وضعیت او د جنسیت پر بنسټ د تبعیض د مخنیوي په اړه خبرې شوې دي

ملالې یوسفزۍ ویلي، افغانستان د طالبانو د واکمنۍ پنځم کال ته نږدې کېږي او په دې موده کې ښځې او نجونې له سختو محدودیتونو سره مخ شوې دي

نوموړې ټینګار کړی چې د افغان ښځو د حقونو د خوندي کولو او په افغانستان کې د عدالت د تأمین لپاره د نړیوالې ټولنې ملاتړ، په ځانګړي ډول د سوېلي افریقا همکاري، خورا مهمه ده

افغان ښځینه فعالانو هم له رامافوسا غوښتي چې د ښځو او نجونو د حقونو په برخه کې د سوېلي افریقا دریځ لا پیاوړی کړي او د جنسیتي اپارتاید د نړیوال جرم په توګه د پېژندلو له هڅو ملاتړ وکړي

دوی ویلي، د افغانستان د ښځو وضعیت یوازې د افغانستان کورنۍ موضوع نه ده، بلکې د بشري حقونو له نړیوالو اصولو سره تړاو لري او د نړیوالې ټولنې جدي او دوامدار غبرګون ته اړتیا لري

د افغان ښځینه فعالانو په باور، د نړۍ د هېوادونو سیاسي او حقوقي فشار کولی شي د ښځو او نجونو پر وړاندې د محدودیتونو د پای ته رسېدو او د هغوی د اساسي حقونو د بېرته ترلاسه کولو لپاره زمینه برابره کړي