ډونالډ ټرمپ: له ایران څخه به د تاوان جبران وغواړو

ډونالډ ټرمپ: له ایران څخه به د تاوان جبران وغواړو

 بریانیوز/ سه شنبه ( ۲۰ / اسد /۱۴۰۵هـ.ش) 

واشنګټن – د امریکا ولسمشر ډونالډ ټرمپ وايي، واشنګټن به له ایران سره په احتمالي راتلونکو خبرو کې له تهران څخه د هغو زیانونو د جبران غوښتنه وکړي چې د امریکا او اسرائیل د بریدونو او وروستیو نښتو له امله رامنځته شوي دي

ټرمپ په «ټروت سوشیال» ټولنیزه شبکه کې په یوه پیغام کې ویلي، ایران د امریکا او اسرائیل له بریدونو څخه د اوښتو زیانونو په بدل کې د تاوان غوښتنه کړې؛ خو د نوموړي په وینا، دا موضوع په تېرو خبرو او لیدنو کې نه وه مطرح شوې

د امریکا ولسمشر زیاته کړې چې واشنګټن به هم له ایران څخه د هغو امریکايي وګړو د وژل کېدو او ټپي کېدو په بدل کې د تاوان غوښتنه وکړي چې د تېرو شخړو پر مهال یې ژوند له لاسه ورکړی یا ټپیان شوي دي

ټرمپ په ځانګړي ډول د «یو اس اس کول» بېړۍ د برید قربانیانو ته اشاره کړې او ویلي یې دي چې د دغې پېښې د قربانیانو کورنیو ته هم باید تاوان ورکړل شي

نوموړي همداراز ویلي چې د ایران د وروستیو پنځو میاشتو د نښتو پر مهال د وژل شویو کسانو د کورنیو لپاره به هم د تاوان غوښتنه مطرح کړي

ټرمپ ټینګار کړی چې امریکايي استازي به په هر ډول راتلونکو خبرو کې له تهران سره د غرامت موضوع مطرح کوي

د امریکا او ایران ترمنځ د تاوان پر سر د اختلافاتو مطرح کېدل په داسې حال کې دي چې دواړه لوري د راتلونکو احتمالي خبرو او د شخړې د پای ته رسولو لپاره د سیاسي حل لارې په لټه کې دي