مقاله

واشنګټن : د جورج ټاون پوهنتون ارزونه: افغانستان د ښځو لپاره د نړۍ تر ټولو بد هېواد دی

اشتراک گذاری:

بریانیوز/ سه شنبه ( ۲۰ / اسد /۱۴۰۵هـ.ش)

د امریکا د جورج ټاون پوهنتون د ښځو، سولې او امنیت انسټیټیوټ په خپله کلنۍ ارزونه کې افغانستان د ښځو د ژوند، خوندیتوب او حقونو له پلوه د نړۍ تر ټولو ټیټ هېواد بللی دی

د دې ارزونې له مخې، افغانستان د ۱۸۱ هېوادونو په نوملړ کې وروستی ځای لري. په راپور کې د ښځو وضعیت د ۱۳ بېلابېلو شاخصونو له مخې ارزول شوی چې پکې د ښځو خوندیتوب، عدالت ته لاسرسی، سیاسي او ټولنیز مشارکت او د هغوی د حقونو وضعیت شامل دي

د راپور له مخې، په افغانستان کې د ښځو پر وړاندې پراخ محدودیتونه او د هغوی د زده‌کړو، کار، ټولنیز ژوند او عامه چارو ته د لاسرسي کمښت د هېواد د وروستي ځای خپلولو له مهمو عواملو څخه دي

په مقابل کې، ډنمارک د ښځو د خوندیتوب، عدالت او مشارکت له پلوه د نړۍ لومړی هېواد بلل شوی دی. له ډنمارک وروسته ایسلنډ، ناروې، سویډن او فنلنډ د ښځو لپاره د غوره شرایطو لرونکو هېوادونو په کتار کې راغلي دي

د ښځو، سولې او امنیت شاخص هڅه کوي په بېلابېلو هېوادونو کې د ښځو د ژوند وضعیت د امنیت، عدالت او مشارکت له اړخه وارزوي

د راپور له مخې، د هېوادونو ترمنځ د ښځو د حقونو او خوندیتوب په برخه کې د پام وړ توپیرونه لا هم شته او افغانستان د دې تشې تر ټولو څرګند مثال بلل شوی دی