ناروې د کډوالو شورا: ناټو افغانانو سره خپلې ژمنې هېرې کړې دي

ناروې د کډوالو شورا: ناټو افغانانو سره خپلې ژمنې هېرې کړې دي

 بریانیوز/ سه شنبه ( ۲۰ / اسد /۱۴۰۵هـ.ش)

کابل – د ناروې د کډوالو شورا په خپل تازه راپور کې ویلي چې د ناټو غړو هېوادونو له افغانانو سره کړې ژمنې له پامه غورځولې او په داسې حال کې یې افغانان یوازې پرېښي چې په هېواد کې بشري اړتیاوې ورځ تر بلې زیاتېږي

د دې شورا مشر یان ایګلنډ ویلي، ناټو غړو هېوادونو له افغان نجونو او هلکانو مخ اړولی او د افغانستان د بشري وضعیت د خرابېدو پر مهال یې د افغانانو د ملاتړ په برخه کې خپلې ژمنې نه دي پوره کړې

د راپور له مخې، له ۲۰۲۳ کال راهیسې له ایران، پاکستان او نورو ګاونډیو هېوادونو څخه له شپږ میلیونو ډېر افغانان بېرته افغانستان ته ستانه شوي دي

راپور زیاتوي چې د راستنو شویو افغانانو شاوخوا ۷۳ سلنه وزګار دي او د کار نشتوالی، کمزوری اقتصادي وضعیت او د لومړنیو خدمتونو محدود لاسرسی د دوی ژوند له جدي ستونزو سره مخ کړی دی

د ناروې د کډوالو شورا وايي، د کډوالو د بېرته ستنېدو ترڅنګ د اقلیمي بدلونونو ناوړه اغېزې او پر ښځو او نجونو لګېدلي محدودیتونه هم د افغانانو پر ژوند فشار زیاتوي

یان ایګلنډ ټینګار کړی چې نړیواله ټولنه باید افغانستان یوازې پرې نه ږدي، ځکه د میلیونونو افغانانو بشري اړتیاوې لا هم پراخې دي او د نړیوالو مرستو کمښت کولی شي وضعیت نور هم خراب کړي

د شورا په باور، د افغانانو د ملاتړ لپاره دوامدارې بشري مرستې، د کار فرصتونه او د بنسټیزو خدمتونو پیاوړتیا اړینه ده