صحّت

د لوږې ضد اقدام: په افغانستان کې خوارځواکي بې‌ ساري کچې ته لوړه شوې

اشتراک گذاری:

بریانیوز/ چهار شنبه ( ۲۱ / اسد /۱۴۰۵هـ.ش)

کابل – د لوږې ضد اقدام سازمان په خپل تازه راپور کې خبرداری ورکړی چې په افغانستان کې د خوارځواکۍ کچه په بې‌ساري ډول لوړه شوې او د وچکالۍ او بشري مرستو د بودیجې کمښت دغه وضعیت لا پسې سخت کړی دی

د دغه سازمان د راپور له مخې، یوازې په کابل کې د خوارځواکۍ د درملنې په مرکزونو کې د نویو ناروغانو شمېر ۱۴۹ سلنه زیات شوی دی

راپور زیاتوي چې په هلمند کې هم د خوارځواکۍ د ناروغانو د پام وړ زیاتوالي له امله د درملنې لپاره د بسترونو شمېر له ۴۵ څخه ۱۱۸ ته لوړ شوی دی

د لوږې ضد اقدام سازمان وايي، د وچکالۍ دوام، د خوراکي توکو کمزوری لاسرسی او د بشري مرستو لپاره د مالي سرچینو کمېدل د دې لامل شوي چې ګڼې کورنۍ له سختو ستونزو سره مخ شي

دغه سازمان خبرداری ورکړی چې که بېړنۍ مرستې ونه رسېږي، په ځانګړي ډول ماشومان او میندې به د خوارځواکۍ له لا ډېرو جدي پایلو سره مخ شي.

د دې بنسټ په وینا، د خوارځواکۍ د مخنیوي او د ناروغانو د درملنې لپاره د روغتیايي خدمتونو پراخول او د بشري مرستو دوام اوس تر بل هر وخت ډېر اړین دي