مقاله

ایران: د افغانستان په اقتصادي پروګرامونو کې فعاله ونډه لرو

اشتراک گذاری:

بریانیوز/ چهار شنبه ( ۲۱ / اسد /۱۴۰۵هـ.ش)

کابل – په کابل کې د ایران سفیر علي رضا بیکدلي وايي، تهران د افغانستان په بېلابېلو اقتصادي پروګرامونو کې فعاله ونډه لري او هڅه کوي چې د دواړو هېوادونو ترمنځ اقتصادي اړیکې لا پیاوړې شي

بیکدلي دغه څرګندونې په کابل کې د کرنې په نړیوال نندارتون کې د ګډون پر مهال کړې دي. نوموړي ویلي، په دغه نندارتون کې ۵۰ ایراني شرکتونو ګډون کړی او خپل بېلابېل تولیدات یې نندارې ته وړاندې کړي دي

د ایران سفیر ټینګار کړی چې د افغانستان له اقتصادي پروګرامونو سره د تهران همکاریو ته دوام ورکول د دواړو هېوادونو د اقتصادي اړیکو د پراختیا لپاره مهم دي

بلخوا د طالبانو د کرنې وزارت وايي، د کرنې نړیوال پنځه‌ورځنی نندارتون د زمري په ۲۰مه په کابل کې پرانیستل شوی دی

د دغه وزارت په وینا، د نندارتون اساسي موخه د افغان بزګرانو او تولیدوونکو لپاره د بازار موندنې زمینه برابرول، د کرنیزو محصولاتو معرفي کول او د کورنیو او بهرنیو سوداګرو ترمنځ د تجربو او اړیکو شریکول دي

د نندارتون په ترڅ کې د افغانستان او نورو هېوادونو یو شمېر شرکتونو خپل کرنیز محصولات او تولیدات نندارې ته وړاندې کړي دي. چارواکي تمه لري چې دغه ډول نندارتونونه به د افغان کروندګرو د تولیداتو لپاره د بازار موندنې او د صادراتو د پراختیا زمینه نوره هم برابره کړي