تعلیم

یونسکو: طالبانو ۲.۴ میلیونه افغان نجونې له زده‌کړو بې‌برخې کړې دي

اشتراک گذاری:

بریانیوز/ چهار شنبه ( ۲۱ / اسد /۱۴۰۵هـ.ش)

د ملګرو ملتونو د ښوونې، ساینس او کلتور سازمان «یونسکو» وايي، په افغانستان کې د نجونو پر زده‌کړو د بندیز له امله شاوخوا ۲.۴ میلیونه نجونې له ښوونیز بهیر څخه بې‌برخې شوې دي

یونسکو خبرداری ورکړی چې د نجونو پر زده‌کړو د محدودیتونو دوام به نه یوازې د افغانستان د بشري پانګې پر راتلونکي اغېز وکړي، بلکې د هېواد اقتصاد ته به هم درانه زیانونه واړوي

د دغه سازمان په وینا، د نجونو د زده‌کړو د دوامدار بندښت له امله به تر ۲۰۶۶ کال پورې په سلګونو زره افغان ښځې د کار له بازار څخه لرې پاتې شي؛ هغه څه چې د افغانستان د اقتصادي ودې لپاره به اوږدمهاله منفي پایلې ولري

یونسکو ټینګار کوي چې زده‌کړه د اقتصادي پرمختګ، د کارموندنې او د ټولنې د پیاوړتیا لپاره بنسټیز اهمیت لري او د نجونو له زده‌کړو محرومول د هېواد راتلونکی له جدي ننګونو سره مخ کوي

بلخوا، د ملګرو ملتونو د ماشومانو صندوق «یونیسف» وايي، پر ښځو او نجونو د زده‌کړو او کار محدودیتونه هر کال د افغانستان اقتصاد ته شاوخوا ۸۴ میلیونه ډالره زیان اړوي

د ملګرو ملتونو اړوند بنسټونه ټینګار کوي چې د نجونو او ښځو زده‌کړې او کار ته د لاسرسي زمینه برابرول د افغانستان د اقتصادي بیا رغونې او د ټولنې د راتلونکي لپاره له مهمو اړتیاوو څخه دي