اخبار جهان

مسکو : روسیه له شمالي کوریا سره د نوې لارې او پُل د جوړولو پروژه پیلوي

اشتراک گذاری:

بریانیوز/ چهار شنبه ( ۲۱ / اسد /۱۴۰۵هـ.ش)

روسیه له شمالي کوریا سره د خپلو اړیکو د پراختیا په موخه د دواړو هېوادونو ترمنځ د لویې لارې او یوه نوي پُل د جوړولو پروژه پر مخ وړي

د راپورونو له مخې، دغه پُل به د تومان پر سیند جوړ شي او روسیه او شمالي کوریا به د سړک له لارې هم سره ونښلوي. دواړه هېوادونه د روسیې په ختیځ کې د خاسان په سیمه کې شاوخوا ۱۷ کیلومتره ګډه پوله لري

تر دې وړاندې د دواړو هېوادونو ترمنځ د سوداګریزو توکو د لېږد لپاره د رېل پټلۍ کارول کېده، خو د نوې لارې او پُل جوړېدل به د ځمکني ترانسپورټ ظرفیت پراخ کړي او د سوداګرۍ د زیاتېدو زمینه به برابره کړي

روسیه او شمالي کوریا په وروستیو کلونو کې خپلې سیاسي او پوځي اړیکې هم پراخې کړې دي. د دواړو هېوادونو ترمنځ د ستراتیژیکې همکارۍ د زیاتېدو له امله د لوېدیځو هېوادونو اندېښنې هم زیاتې شوې دي

ځینې راپورونه اټکل کوي چې د نوې لارې له جوړېدو سره به د دواړو هېوادونو ترمنځ د توکو او خلکو تګ راتګ اسانه شي او ښايي شمالي کوریا له دې لارې روسیې ته د خپلو کارکوونکو او پوځي پرسونل د لېږد په برخه کې هم استفاده وکړي

خو د دې لارې له لارې د اوکراین جګړې ته د شمالي کوریا د سرتېرو د احتمالي لېږد په اړه تر اوسه رسمي تایید نه دی شوی