بدخشان د پراخو نښتو پر درشل؛ د طالبانو پر وړاندې د وسله‌والو ډلو د فعالیتونو او پرمختګونو په اړه تازه راپورونه

د بدخشان ولایت د امنیتي وضعیت په اړه ځینې سیمه‌ییزې سرچینې وايي چې په یو شمېر ولسوالیو کې د طالبانو پر وړاندې د بېلابېلو وسله‌والو ډلو فعالیتونه زیات شوي او په ځینو سیمو کې د جګړې او احتمالي پراخېدو اندېښنې موجودې دي.

بریانیوز-پنجشنبه ٢٢ اسد ١٤٠٥

د سرچینو د معلوماتو له مخې، شاوخوا ۵۰ کسیزه وسله‌واله ډله د کشم ولسوالۍ په لوړو غرنیو سیمو کې حضور لري. همداراز، د درایم ولسوالۍ د یمچیان په سیمه کې شاوخوا ۳۰ کسیز ځواک فعالیت کوي.

سرچینې همداراز د «سپاهیان میهن» په نوم د یوې بلې جبهې د فعالیت خبر ورکوي. د معلوماتو له مخې، د یفتل پایین ولسوالۍ له سیمو څخه د دې ډلې ځواکونو یو شمېر پوځي تجهیزات له ځان سره غرنیو سیمو ته انتقال کړي او اوس په یفتل کې حضور لري. 

په ورته مهال، د سرچینې په وینا، په زیباک ولسوالۍ کې یوه بله جبهه هم فعاله ده چې د ځواکونو شمېر یې له ۴۰۰ څخه زیات اټکل شوی. 

د جرم او خستک په سیمو کې هم د شاوخوا ۳۰ کسیزې بلې وسله‌والې ډلې د فعالیت راپور ورکړل شوی. ویل کېږي چې دغې ډلې کله ناکله په ځینو سیمو کې امنیتي پوستې او چک‌پاینټونه جوړوي.

له بلې خوا، د جمعه‌خان فاتح اړوند ځواکونو او طالبانو ترمنځ د نښتو په اړه هم راپورونه خپاره شوي دي. د سیمه‌ییزې سرچینې په ادعا، په وروستیو نښتو کې د طالبانو د کمانډو قطعې شاوخوا ۱۶ کسان وژل شوي، ۱۷ نور اسیر شوي او ۱۶ نور ټپیان شوي دي. سرچینه همداراز ادعا کوي چې نسي ولسوالۍ د جمعه‌خان فاتح ځواکونو تر کنټرول لاندې راغلې ده.

سرچینه وايي، طالبان د وضعیت د کنټرول لپاره د هلیکوپترونو له لارې د هلمند، کندهار، غزني او د بدخشان له نورو سیمو څخه د پام وړ شمېر ځواکونه د دروازو سیمو ته انتقال کړي دي.

د سرچینې په وینا، تېره شپه شاوخوا اته بجې د بدخشان ولایت د مقام پر دفتر هم دوه راکټي بریدونه شوي او د درنو او سپکو وسلو، په ځانګړي ډول پیکا او کلاشینکوفونو، سلګونه ډزې شوې دي.

سیمه‌ییزه سرچینه خبرداری ورکوي چې که د جمعه‌خان فاتح ځواکونه وکولای شي شاوخوا یوه اوونۍ خپل مقاومت او پرمختګ وساتي، ښايي د بدخشان په نورو ولسوالیو کې هم د طالبانو او وسله‌والو مخالفو ډلو ترمنځ د پراخو نښتو احتمال زیات شي.