بدخشان کې د طالبانو چورلکه ویشتل شوې؛ د مرګ‌ژوبلې په اړه لا کره معلومات نشته

اشتراک گذاری:

محلي سرچینې وايي، د بدخشان ولایت د نسي ولسوالۍ په مرکز کې د طالبانو یوه چورلکه د وسله‌والو له خوا «ویشتل شوې» او وروسته لوېدلې ده.

بریانیوز- پنجشنبه، ٢٢ اسد ١٤٠٥

د بریانیوز د راپور له مخې، لومړني معلومات ښيي چې د چورلکې پر وړاندې ډزې د جمعه‌خان فاتح اړوندو وسله‌والو کړې دي. سرچینې وايي، له ډزو وروسته چورلکه لوېدلې ده.

د سرچینو په وینا، چورلکه د استوګنې په یوه سیمه کې لوېدلې او ښايي مرګ‌ژوبله یې اړولې وي؛ خو تر دې دمه په چورلکه کې د سپرو کسانو دقیق شمېر او د احتمالي وژل شویو او ټپیانو په اړه کره معلومات نه دي ترلاسه شوي.

دا پېښه داسې مهال راپور کېږي چې په نسي ولسوالۍ کې د طالبانو او د جمعه‌خان فاتح د اړوندو وسله‌والو ترمنځ په وروستیو ورځو کې د نښتو راپورونه هم خپاره شوي دي.