اروپايي ټولنې افغانستان ته د بشري مرستو لپاره ۱۰ میلیونه یورو ځانګړي کړل

اروپايي ټولنې افغانستان ته د بشري مرستو لپاره ۱۰ میلیونه یورو ځانګړي کړل

 بریانیوز/ جمعه ( ۲۳ / اسد /۱۴۰۵هـ.ش)

د ملګرو ملتونو د بشري مرستو د همغږۍ ادارې «اوچا» ویلي، اروپايي ټولنې د افغانستان د بشري مرستو له صندوق سره ۱۰ میلیونه یورو مرسته کړې ده

اوچا د دې مرستې هرکلی کړی او له اروپايي ټولنې یې مننه کړې ده. دغه اداره وايي، تازه مرسته به په افغانستان کې د میلیونونو اړمنو کسانو لپاره د بشري مرستو د دوام په برخه کې ولګول شي

د اوچا په وینا، افغانستان لا هم له پراخ بشري بحران سره مخ دی او د مرستو اړتیا په ګڼو سیمو کې زیاته ده. د نړیوالو مرستو دوام د زیان‌منو کورنیو لپاره د خوړو، روغتیا، اوبو او نورو اړینو خدمتونو د برابرولو په برخه کې مهم بلل کېږي

بل لور ته، د اروپايي ټولنې د بهرني سیاست مشره کایا کالاس وايي، له طالبانو سره تعامل د هغوی د رسمي پېژندنې په معنا نه دی

کالاس ټینګار کړی چې د طالبانو د رسمیت پېژندلو موضوع له یو شمېر اساسي شرطونو سره تړلې ده، چې په افغانستان کې د ښځو او نجونو د حقونو خوندیتوب او د یوه ټولګډونه حکومت جوړېدل پکې شامل دي

د اروپايي ټولنې چارواکي وايي، له افغانستان سره بشري مرستې د افغان ولس د اړتیاوو پر بنسټ دوام کوي، خو له طالبانو سره د سیاسي تعامل موضوع له بشري مرستو جلا ده

د اروپايي ټولنې دغه دریځ په داسې مهال څرګندېږي چې طالبان هڅه کوي له سیمه‌ییزو او نړیوالو هېوادونو سره خپلې اړیکې پراخې کړي، خو تر اوسه هېڅ اروپايي هېواد د طالبانو حکومت په رسمي ډول نه دی پېژندلی