اخبار جهان

د عراق صدراعظم: د هېڅ ګاونډي هېواد پر ضد به زموږ خاوره ونه کارول شي

اشتراک گذاری:

بریانیوز/ جمعه ( ۲۳ / اسد /۱۴۰۵هـ.ش)

بغداد – د عراق صدراعظم علي الزیدي وايي، حکومت به هېچا ته اجازه ورنه کړي چې د عراق خاوره یا هوايي حریم د ایران په ګډون د دغه هېواد د ګاونډیو پر وړاندې د بریدونو او پوځي اقداماتو لپاره وکاروي

الزیدي ټینګار کړی چې عراق د خپلو ګاونډیو پر وړاندې د هر ډول پوځي فعالیت لپاره د خپلې خاورې او هوايي حریم له کارېدو سره مخالف دی

نوموړي ویلي، بغداد غواړي له ټولو ګاونډیو هېوادونو سره د متقابل درناوي پر بنسټ اړیکې وساتي او د عراق خاوره د سیمه‌ییزو شخړو د پراخېدو لپاره د وسیلې په توګه ونه کارول شي

د عراق د صدراعظم دا څرګندونې په داسې مهال کېږي چې په سیمه کې د ایران او نورو هېوادونو ترمنځ امنیتي ترینګلتیاوې دوام لري او د عراق جغرافیایي موقعیت د سیمه‌ییزو شخړو له امله له ځانګړي حساسیت سره مخ دی

بغداد په وروستیو کلونو کې په وار وار ټینګار کړی چې نه غواړي د ایران او امریکا یا د سیمې د نورو هېوادونو ترمنځ د شخړو په ترڅ کې د عراق خاوره د پوځي عملیاتو لپاره وکارول شي