مقاله

هریپور:د پنځه کلنې ماشومې د تښتونې او وژنې په قضیه کې څلور کسان نیول شوي

اشتراک گذاری:

بریانیوز پنجشنبه ( ۵/ سنبله /۱۴۰۵هـ.ش)

د خیبر پښتونخوا د هریپور ولسوالۍ پولیسو ویلي، د یوې پنځه کلنې ماشومې د تښتونې، جنسي تېري او وژنې په تړاو یې څلور کسان نیولي دي

دغه ماشومه، چې ایت نور نومېده، د روانې میاشتې په لومړیو کې له خپل کوره ورکه شوې وه. د هغې له لادرکۍ وروسته د کورنۍ له خوا پولیسو ته خبر ورکړل شو او د موندلو لپاره یې پلټنې پیل شوې

د هریپور د پولیسو مشر شفیع‌الله ګنډاپور ویلي، پولیسو د امنیتي کمرې د ثبت شویو انځورونو، لومړنیو معلوماتو او پراخو پلټنو له لارې د پېښې په تړاو څلور کسان پېژندلي او نیولي دي

د نوموړي په وینا، د نیول شویو کسانو له معلوماتو وروسته پولیسو د ماشومې مړی له یوې وچې څاه څخه موندلی دی

پولیس وايي، د پېښې د څرنګوالي او د تورنو کسانو د احتمالي ونډې په اړه لا هم څېړنې روانې دي او نیول شوي کسان به د قانون له مخې محکمې ته وړاندې شي

د ماشومې د وژنې دې پېښې د هریپور په سیمه کې پراخ غبرګونونه راپارولي او د ماشومانو د خوندیتوب او د ورته پېښو د مخنیوي په اړه یې اندېښنې زیاتې کړې دي

د ایت نور کورنۍ د پېښې د بشپړې څېړنې او د عاملینو لپاره د قانون له مخې د سختې سزا غوښتنه کوي