بشري مرستو : افغانستان کې د پانګونې او بشري مرستو په اړه د آسیایي هېوادونو د همکارۍ ژمنه

اشتراک گذاری:

(بریانیوز جمعه (۳/ میزان /۱۴۰۵هـ.ش

د ریاست‌الوزراء د دفتر عمومي رییس ملا عبدالواسع او د آسیایي هېوادونو د اقتصادي پراختیا کمېټې رییس یون سوک هون د ویډیوکنفرانس له لارې د افغانستان د اقتصادي ودې، پانګونې او بشري مرستو په اړه خبرې کړې دي

ملا عبدالواسع په دې خبرو کې ویلي، اسلامي امارت له کورنیو او بهرنیو پانګه‌والو سره د لازمې همکارۍ او اسانتیاوو برابرولو ته چمتو دی او په افغانستان کې د امنیت له ټینګېدو سره د پانګونې لپاره مناسب چاپېریال رامنځته شوی دی

نوموړي له وروستیو جګړو، سېلابونو او زلزلو څخه د زیانمنو شویو افغانانو وضعیت ته هم اشاره کړې او له نړیوالې ټولنې یې د اړمنو کورنیو لپاره د بشري مرستو د زیاتولو غوښتنه کړې ده

بل لور ته، یون سوک هون ویلي، د آسیایي هېوادونو د اقتصادي پراختیا کمېټه غواړي له افغانستان سره د اقتصادي ودې په برخه کې خپلې همکارۍ پراخې کړي. نوموړي زیاته کړې چې د کمېټې غړي هېوادونه به هم وهڅوي چې له افغانانو سره د بشري مرستو په برخه کې ونډه واخلي

هغه افغانستان ته د یوه دوست هېواد په سترګه کتلو ته په اشارې ویلي، د دوی کمېټه له افغانستان سره هر اړخیزې همکارۍ ته چمتو ده

یون سوک هون څرګنده کړې چې د خپلې راتلونکې سفر پر مهال به په افغانستان کې د انرژۍ، په ځانګړي ډول د لمریزې برېښنا، د پانګونې فرصتونه له نږدې وڅېړي

د دواړو لورو دا خبرې په داسې مهال ترسره کېږي چې افغانستان د اقتصادي ودې، بهرنیو پانګونو جذب او د انرژۍ د اړتیاوو د پوره کولو لپاره د نوو همکاریو په لټه کې دی