اخبار جهان

هوايي برید : د سوډان د سرو زرو پر کان هوايي برید؛ د ۲۰۰ کسانو د وژل کېدو ادعا شوې

اشتراک گذاری:

(بریانیوز دو شنبه (۲۰/ میزان /۱۴۰۵هـ.ش

د سوډان او مصر پولې ته نږدې د سرو زرو پر یوه کان هوايي برید کې د شاوخوا ۲۰۰ کسانو د وژل کېدو او د سلګونو نورو د ټپي کېدو راپورونه خپاره شوي دي. د ژغورل شویو کسانو په وینا، د شنبې ورځې په برید کې د کان د کارکوونکو استوګنځایونه او د کیندنې ځینې برخې هم ویجاړې شوې دي

د سوډان د رسنیو د راپورونو له مخې، برید د هېواد په شمال ختیځ کې د مصر پولې ته څېرمه د سرو زرو پر کانونو شوی دی. د ژغورل شویو کسانو په وینا، د برید پر مهال ګڼ کارکوونکي د کانونو دننه وو او ښايي ځینې یې لا هم د نړېدلو خاورو او ډبرو لاندې بند پاتې وي. له همدې امله د مرګ‌ژوبلې د شمېر د لوړېدو وېره هم شته

ځايي اوسېدونکو د برید پړه د مصر پر پوځ اچولې او ادعا یې کړې چې تر دې وړاندې هم مصري ځواکونو په سیمه کې امنیتي عملیات کړي او کان‌کیندونکو ته یې د ورتګ د مخنیوي خبرداری ورکړی و. خو د برید د ترسره کوونکي لوري په اړه خپلواکه تایید لا نه دی شوی

د مصر حکومت تر اوسه د دغو ادعاوو په اړه رسمي څرګندونې نه دي کړې. د سیمې لرېوالی، د روغتیايي مرکزونو کمښت او د ژغورنې د امکاناتو محدودیت د ټپیانو درملنه او د قربانیانو د کره شمېر معلومول ستونزمن کړي دي

د سوډان د سرو زرو کانونه د دغه هېواد د اقتصاد مهمه برخه ده، خو د روانې جګړې او ناامنۍ له امله زرګونه کسان د کار او عاید د ترلاسه کولو لپاره غیررسمي کان‌کیندنې ته مخه کوي. د پولې په شاوخوا کې د سرو زرو پر سر شخړې او امنیتي عملیات هم له پخوا راهیسې د تاوتریخوالي لامل شوي دي

د یادونې وړ ده چې د ځینو نړیوالو رسنیو او روغتیايي سرچینو په راپورونو کې د مرګ‌ژوبلې شمېر له دې ادعا څخه ډېر کم ښودل شوی؛ نو د شاوخوا ۲۰۰ وژل شویو کسانو شمېره لا خپلواکه تایید ته اړتیا لري