اخبار جهان

جوزجان کې د طالب چارواکو نوې هدایت؛ حکومتي کارکوونکي د «لنګي» پر اغوستو مکلف شول

اشتراک گذاری:

معتبرې محلي سرچينې دبریا نیوز شبکې ته ويلي چې په جوزجان ولايت کې طالب چارواکو له نن، شنبه د لړم لومړۍ نېټې (۱ قوس) څخه ټول دولتي کارکوونکي د سرپوښ يا «لنګي» په اغوستو مکلف کړي دي

د سرچینو په وینا، دغه پرېکړه په ټولو محلي ادارو کې يو دمه عملي شوې او ټولو ادارو ته ليکلې او شفاهي خبرتیا ورلېږل شوې وه. سرچینې زیاتوي چې طالبانو د تېرو ورځو په اوږدو کې کارکوونکو ته خبرداری ورکړی و چې د نوي حکم د پلي کېدو لپاره دې ځانونه چمتو کړي

اوس مهال ډېری کارکوونکي د جوزجان په حکومتي ادارو کې د لنګي په تړلو دفترونو ته ورننوتي او د دغه نوي اصولو رعایت یې پیل کړی دی

ويل کېږي چې دغه تازه امر د طالبانو د والي دفتر او د ولايت د اداري چارو د رياست له‌خوا صادر شوی او ټولو ادارو ته يې د بېړني تطبیق سپارښتنه شوې ده

تر اوسه د طالبانو له رسمي کانالونو څخه په دې اړه څرګندونې نه دي خپرې شوې

د یادونې وړ ده چې په تیرو میاشتو کې طالبانو په ګڼو ولایتونو کې د دولتي کارکوونکو لپاره د جامو او ظاهري بڼې په اړه بېلابېل محدودیتونه لګولي، چې له امله یې د خلکو او کارکوونکو اندېښنې زیاتې شوې دي