امریکا د اندېښنې وړ هېوادونو د وګړو د ګرین کارټونو سختې بیاکتنې پيل کړې؛ د افغانانو مهاجرتي دوسیې ځنډول شوې

واشنګټن – د امریکا د تابعیت او مهاجرت د خدماتو  مشر، جوزف اډلو، اعلان کړی چې د ولسمشر ډونالډ ټرمپ د نوې لارښوونې له مخې د هغو هېوادونو د اتباعو د ګرین کارټونو پراخه، سخت‌ګیرانه او بې‌سارې امنیتي بیاکتنه پيل شوې چې د امریکا له نظره «د امنیتي اندېښنو سرچینې» ګڼل کېږي

د امریکا امنیت هېڅکله د معاملې وړ نه دی. موږ د هېڅ ډول احتمالي خطر د ننه کېدو اجازه نه ورکوو. د امریکا د خلکو ساتنه زموږ مطلق لومړیتوب دی

اډلو په خپله فېسبوک پاڼه لیکلي چې د مخکینۍ ادارې د «بې‌پروا بیا مېشتېدو» تګلارې د امریکا د خلکو د امنیت لپاره زیانمنې وې او اوسنی سخت‌ګیرانه اقدام د همدې خلا د ډکولو لپاره ترسره کېږي

د افغانانو غوښتنلیکونه تر نامعلومه وخته ځنډول شوي

دا پرېکړه په داسې حال کې رامنځته شوې چې څو ورځې مخکې د امریکا د مهاجرت ادارې اعلان کړی و چې د سپینې ماڼۍ ته نږدې د یوې امنیتي پېښې 

چې راپورونه وایي یو افغان یې په کې د ملي ګارد پر سرتېرو برید کړی – وروسته د افغان اتباعو ټول مهاجرتي غوښتنلیکونه «تر نامعلومه وخته» درولي دي

دغه ګام یو ناڅاپي او د پراخو اغېزو لرونکی تطبیقي اقدام بلل شوی چې زرګونه افغانان یې اندېښمن کړي دي؛ هغه افغانان چې یا په خطر کې دي، یا کورنۍ لري، او یا د جګړې او سیاسي محدودیتونو له امله د امریکا د پناه او مېشتېدو په پروسه تکیه کوي

شنونکي: دا پرېکړه به اوږدمهاله اغېزې ولري

سیاسي شنونکي او د کډوالۍ د حقونو مدافعین وایي چې دغه اقدام به د زرګونو کورنیو برخلیک لا پېچلی کړي او د هغو کسانو لپاره چې ژوند یې په خطر کې دی، سختې ستونزې رامنځته کړي

خو د امریکا حکومت وايي چې د ملي امنیت په اړه هېڅ ډول خطر د منلو نه دی او دا نوې ارزونه به ډاډ ورکړي چې یوازې هغه کسان چې هېڅ امنیتي ستونزه نه لري، د امریکا خاورې ته داخلېږي

نامعلومه راتلونکې

تر دې دمه روښانه نه ده چې دا سختې بیاکتنې به څومره وخت دوام وکړي او د افغانانو ځنډول شوې دوسیې به کله بیا فعالې شي. خو څرګنده ده چې د دې پرېکړې اغېزې به ژورې او پراخې وي او د زرګونو مهاجرو د ژوند په لوریو باندې به مستقیم تاثیر وکړي

د دې موضوع د لا پرمختګ لپاره نړیوالې او داخلي څارونکي له نږدې څارنه کوي