د روسیې ولسمشر ولادیمیر پوتین: «اوکراین باید ځمکې پرېږدي» – د جګړې د پای شرط لا هم سخت، لانجمن او یو اړخیز

د روسیې ولسمشر ولادیمیر پوتین په تازه څرګندونو کې یو ځل بیا د جګړې د پایلو په اړه خپل توند دریځ تکرار کړی او ویلي یې دي چې اوکراین یوازې هغه مهال د سولې له مسکو سره کومې هوکړې ته رسېدای شي، چې د روسیې تر واک لاندې سیمې په رسمي ډول پرېږدي. د ده په وینا، پرته له دې شرطه، د جګړې پای یا د بریدونو درېدنه هېڅ امکان نه لري

نړیوالو رسنیو د پنج‌شنبې، د نومبر په ۲۷مه، د پوتین له قوله لیکلي چې دا شرط کولای شي د راتلونکو خبرو بنسټ جوړ کړي، خو اوکراین باید «عملآ شاتګ» وکړي، که نه نو جګړه به د همدغو سیمو پر سر لا پسې پراخه شي

پوتین په څرګندونو کې ویلي:

که اوکرایني ځواکونه هغه سیمې پرېږدي چې موږ یې د روسیې برخه بولو، جګړه به ودرېږي. که نه، موږ به له نظامي لارې خپلو اهدافو ته ورسېږو

دا څرګندونې وروسته له هغه کېږي چې د سولې یوه ۲۸ ماده‌ییزه مسوده په رسنیو کې ښکاره شوې

په دې مسوده کې له اوکراین څخه داسې غوښتنې شوې چې کییف یې غیرمنطقي، یو اړخیز او د ملي حاکمیت خلاف» بولي. د مسودې مهم ټکي داسې دي

اوکراین باید هغه سیمې واگذار کړي چې مسکو یې بشپړ نظامي نیول نه دي توانېدلي؛

د امریکا پوځي مرسته باید کمه شي او د لوېدیځ ملاتړ محدود شي؛

په اوکراین کې د لوېدیځو ځواکونو ځای پر ځای کول په مطلق ډول منع شي

سیاسي او پوځي شنونکي باور لري چې دغه غوښتنې د اوکراین له پاره د منلو نه دي، ځکه دا د خاورې، ملي هویت او خپلواکۍ له لوی زیان سره برابر دي. د اوکراین چارواکو مخکې په ښکاره توګه ویلي چې «هیڅ ډول خبرې د ځمکې د پرېښودو پر اساس نه کېږي» او د هېواد د ځمکنۍ بشپړتیا دفاع د هغوی سرې کرښې دي

له بلې خوا، د جګړې دوام د اروپا امنیت، نړیوال اقتصاد او بشري وضعیت ته سخته صدمه رسوي. هېوادونه هڅه کوي چې دواړه لوري خبرو ته کېنوي، خو تر اوسه داسې ښکاري چې د مسکو او کییف دریځونه دومره لرې دي چې ګډه نقاط پیدا کول اسانه کار نه دی

سره له دې، نړیوال فشار ورځ تر بلې زیاتېږي او د جګړې د اوږدېدو تاوان دواړو لورو ته دروند دی. خو تر هغو چې مسکو په خپلو غوښتنو کې نرمښت راو نه وړي او اوکراین د ځمکنۍ بشپړتیا له اصولو تیر نشي، د سولې د مذاکراتو لاره لا هم اوږده، ستونزمنه او له خنډونو ډکه ښکارېږي