په افغانستان کې د ماشومانو او سپین‌ږیرو وژنې؛ د بریتانوي ځواکونو د «جګړې جنایتونو» دروند اعتراف

 د بریتانیا د پوځ یوه پخواني لوړپوړي چارواکي د حقیقت‌ موندنې یوې رسمي څېړنې پر مهال افشا کړه چې د دغه هېواد ځانګړو ځواکونو په افغانستان کې د جګړې له قوانینو سرغړونه کړې او “جګړه‌ییز جنایتونه” یې ترسره کړي دي

 د جګړې د جنایتونو اعتراف

یاد چارواکي حقیقت‌موندنې کمیټې ته ویلي چې په هغو عملیاتو کې چې د ځانګړو ځواکونو له‌خوا په افغانستان کې ترسره کېدل، ډېر مهال ماشومان، سپین‌ږیري او بې‌وسه ملکي وګړي وژل شوي دي.

هغه ټینګار کړی چې د پوځ په لوړې کچې کې د دې پېښو په اړه معلومات شته وو، خو “هیڅ اقدام ونه شو او د حقایقو د پټولو هڅه وشوه

 د مشکوکو وژنو لړۍ

د رسمي څېړنې اسناد ښيي چې د ځانګړو ځواکونو د عملیاتو پر مهال لسګونه کسان په “نامعلومو او مشکوکو شرایطو” کې وژل شوي دي

ویل کېږي چې یوازې په څو عملیاتو کې ۵۴ ملکي کسان بې له دې چې کوم خطر پېښ کړي، له منځه وړل شوي دي

سرچینې وایي چې ځینې کورونه داسې هدف ګرځول شوي چې هېڅ وسله‌وال پکې نه و او وژل شوي کسان هم عام ملکي افغانان وو

 د ۲۰۱۰ تر ۲۰۱۳ عملیات تر جدي څېړنې لاندې

د حقیقت‌موندنې کمېټه د ۲۰۱۰ – ۲۰۱۳ کلونو تر منځ پر هغو شپنیزو عملیاتو تمرکز لري چې د نړیوال ائتلاف د ماموریت په ترڅ کې ترسره شوي وو

په دغو عملیاتو کې د خلکو د “مخنیوي وړ وژنې” موارد ډېر زیات شوي او د پراخو پوښتنو لامل ګرځېدلي دي

 د افغان کورنیو درد او د عدالت غوښتنه

په افغانستان کې ګڼې کورنۍ چې خپلو عزیزانو یې د ځانګړو ځواکونو په عملیاتو کې له لاسه ورکړي، له کلونو راهیسې د عدالت غوښتنه کوي

هغوی وایي چې د دوی خپلوان بې‌ګناه وو، خو د جګړې د نوم لاندې په عمدي ډول وژل شوي دي

اوس دغه رسمي څېړنه د هغوی لپاره د هیلې نوی څرک بلل کېږي

 نړیوال غبرګون او غوښتنې

د بشري حقونو نړیوال فعالان وایي چې دا افشاګري باید یوازې په بې‌نتیجې ژمنو پای ته ونه رسېږي.

دوی ټینګار کوي چې اړینه ده د حقایقو بشپړ راپور عام شي، مسؤلان محاکمه شي او زیانمنو کورنیو ته حق ورکړل شي

 پایله

دا اعتراف د افغانستان د اوږدې جګړې په تاریخ کې یو ډېر مهم او دروند حقیقت څرګندوي.

څېړونکي وایي چې که دا پلټنې په بشپړ شفافیت سره ترسره شي، کولی شي د جګړې د قربانیانو د انصاف لپاره یو تاریخي ګام وي او د هغو تیارو پېښو پرده پورته کړي چې کلونه پټې ساتل شوې وې