د افغان پناه‌کوونکو غږ: «کډوال باید د سیاسي تصمیمونو قرباني نه شي

په زرګونو افغانان چې د امریکا د بیا مېشتېدو د پروګرامونو له لارې درېیمو هېوادونو ته لېږدول شوي او د خپل راتلونکي په انتظار کې دي، د متحده ایالاتو د وروستي پرېکړې له امله سخته اندېښنه او غصه څرګندوي. د امریکا حکومت د یو انفرادي پېښې له کبله د افغان مهاجرینو د منلو بهیر ځنډولی، هغه کار چې د پناه‌کوونکو په وینا «ناانصافي، غیرمنطقي او د بشري اصولو خلاف دی

یو کس، خو سزا یې زرګونو ته ورکړه

په پاکستان، قطر او متحده عربي اماراتو کې پاتې افغان کډوال وايي چې د امریکا دا پرېکړه د هغو زرګونو کسانو برخلیک لا ګډوډوي چې د جګړو، ګواښونو او نامعلوم برخلیک له امله له هېواده وتلي دي. دوی ټینګار کوي چې یوه پېښه هېڅکله د یوه ملت د زرګونو بې‌ګناه خلکو د هیلې ماتولو جواز نه شي کېدای.

یو تن افغان مهاجر وايي:

«موږ د امنیتي ارزونو په اوږده او سخت بهیر کې له هر پړاو تېر شوي یو. اوس زموږ د برخلیک بندول د بشري اصولو ښکاره نقض دی.»

درېیم هېوادونه – د انتظار اوږده تمه

تر اوسه په زرګونو افغانانو ته چې د امریکا د بیا مېشتېدو مستحق بلل شوي، په موقتي ډول په پاکستان، قطر او اماراتو کې ځای ورکړل شوی دی. د دوی ډېری هره ورځ د خپلو دوسیو د خبر په تمه دي، خو د بهیر ځنډېدو لا ډېرې کورنۍ له ناامیدۍ سره مخ کړې دي

د نړیوالو قوانینو پر بنسټ غوښتنهکډوال غواړي چې نړیوال بنسټونه، د بشري حقونو سازمانونه او د پناه غوښتنې اداره  د دې پرېکړې په بیا کتلو کې خپل رول ولوبوي. دوی وايي چې کډوال باید د سیاست قرباني نه شي، بلکې د خپلو حقونو مطابق د خوندي ژوند فرصت ورکړل شي

د نامعلوم برخلیک اندېښنه

د پروسې د ځنډېدو له امله، ډېرې کورنۍ نه پوهېږي چې د یوې میاشتې وروسته به چېرته وي، د دوی د ماشومانو تعلیم، روغتیا او د ژوند د اساسي اړتیاوو برخلیک څه کېږي