د افغانې نجلۍ انځور د یونیسف د ۲۰۲۵ کال غوره عکس وټاکل شو

د افغانستان د ننګرهار ولایت د یوې لس کلنې نجلۍ، هاجره، اغېزمن انځور د یونیسف له لوري د ۲۰۲۵ کال د عکس په توګه غوره شوی دی. دا انځور، چې د افغان ماشومانو د ژوند له تریخ حقیقت سره سره د هیلې او ارادې ژوره کیسه بیانوي، د نړۍ د پام مرکز ګرځېدلی دی

دا جایزه د جمعې په ورځ د جرمني په پلازمېنه برلین ښار کې د یوې ځانګړې مراسمو پر مهال الیز بلانشار، فرانسوۍ فتوژورنالیستې ته وسپارل شوه. نوموړې دا انځور په داسې شیبه کې اخیستی، چې د افغان نجونو د راتلونکې په اړه پوښتنې لا هم بې‌ځوابه پاتې دي

د یونیسف د داورانو پلاوي ویلي، چې دا انځور یوازې یو عادي عکس نه دی، بلکې د ارادې، انساني کرامت او زغم ژوره هنداره ده. د دوی په وینا، د هاجره دا انځور د هغو میلیونونو افغان نجونو غږ دی، چې له بنسټیز حق، یعنې زده‌کړې، څخه بې‌برخې شوې دي، خو لا هم د پوهې د ترلاسه کولو هیله په زړونو کې ژوندۍ ساتي

په دې انځور کې هاجره له قلم او کاغذ سره، په داسې حال کې ښکاري چې د ځمکې پر سر پرانیستي درسي کتاب ته یې سترګې نیولي او په پوره تمرکز درس وايي. دا هغه شیبه ده چې د ماشوم معصومه هیله او د راتلونکي د نشتون ترخه پوهه سره یو ځای شوې دي، ځکه هغه ښه پوهېږي چې د رسمي زده‌کړې دوام ورته شونی نه دی

دا انځور د نړۍ وجدان راویښوي او نړیوالې ټولنې ته یو روښانه پیغام لري: د افغان نجونو د زده‌کړې حق یوازې یو غوښتنه نه، بلکې د انسانیت یوه نه‌جلا کېدونکې برخه ده. یونیسف ټینګار کړی، چې تر هغه وخته به د ماشومانو د حقونو لپاره خپل غږ پورته ساتي، څو د هاجره په څېر نجونې وکولای شي خپل راتلونکی په خپل لاس ولیکي