په توکیو کې د افغانستان سفارت غیرفعالېږي؛ د ټولو فعالیتونو ځنډول اعلان شول

په جاپان کې د افغانستان د اسلامي جمهوریت سفارت اعلان کړی چې په توکیو کې به خپل فعالیتونه د راتلونکي کال د جنورۍ میاشتې تر پای وروسته ځنډوي او په عملي ډول به غیرفعال شي. دا پرېکړه په داسې حال کې کېږي چې د افغانستان ډېری بهرني ډیپلوماتیک ماموریتونه له سیاسي او مالي ستونزو سره مخ دي

د افغانستان سفارت د جمعې په ورځ د یوې رسمي اعلامیې په خپرولو سره ویلي، چې دا پرېکړه د جاپان د بهرنیو چارو وزارت سره تر سلا مشورو وروسته شوې ده. په اعلامیه کې راغلي چې د دواړو لورو ترمنځ د شرایطو، امکاناتو او موجودو محدودیتونو د ارزونې وروسته، د سفارت د فعالیتونو ځنډول حتمي وبلل شول

د سفارت د بیان له مخې، د جنورۍ له ۳۱مې نېټې وروسته به د سفارت ټول سیاسي، اقتصادي، فرهنګي او قونسلي فعالیتونه تر بلې خبرتیا پورې په بشپړ ډول ودرول شي. په دې کې د پاسپورتونو تمدید، د قونسلي اسنادو صادرول، رسمي لیدنې، فرهنګي پروګرامونه او نور اړوند خدمات شامل دي

دا پرېکړه په ځانګړي ډول په جاپان کې مېشت افغانانو لپاره د اندېښنې وړ بلل کېږي، ځکه د سفارت تړل کېدل به د هغوی پر اداري او حقوقي چارو مستقیم اغېز ولري. یو شمېر افغان کډوال وایي چې د سفارت فعالیتونه د دوی لپاره د یوازیني رسمي مرجع حیثیت درلود او د هغې غیرفعالېدل به نوې ستونزې راولاړې کړي

د یادونې وړ ده چې که څه هم د طالبانو حکومت د سیمې په ګڼو هېوادونو کې د افغانستان د سفارتونو کنټرول ترلاسه کړی، خو په توکیو کې د افغانستان سفارت تر اوسه د پخواني حکومت له‌خوا ټاکل شوي سفیر او ډیپلوماټان اداره کوي. همدا ځانګړنه د دې سفارت دریځ له نورو سفارتونو جلا کوي

سیاسي شنونکي باور لري چې د توکیو د سفارت غیرفعال کېدل د افغانستان د ډیپلوماتیک حضور د کمزورۍ یو بل څرګند نښه ده. د هغوی په اند، د نړیوال مشروعیت نشتوالی، مالي محدودیتونه او سیاسي بې‌ثباتي د دې لامل شوې چې د افغانستان یو شمېر مهم سفارتونه خپل فعالیتونه ودروي

تر اوسه د طالبانو حکومت د دې پرېکړې په اړه رسمي غبرګون نه دی ښودلی، خو څارونکي وایي چې دا پرمختګ به د افغانستان پر بهرنیو اړیکو، په ځانګړي ډول له جاپان سره، منفي اغېزې ولري او د افغانانو د قونسلي اړتیاوو تشه به نوره هم پراخه کړي

په ټوله کې، د توکیو د افغانستان د سفارت غیرفعالېدل د هېواد د ډیپلوماتیک انزوا یو بل پړاو بلل کېږي؛ هغه وضعیت چې لا هم د حل لپاره روښانه او عملي لارې ته اړتیا لري