افغانستان د ښځو لپاره د نړۍ تر ټولو بد هېواد اعلان شو

کابل – یو تازه نړیوال راپور چې د امریکا د جورج‌ ټاون پوهنتون پورې تړلي څېړنیز بنسټ له‌خوا چمتو شوی، افغانستان د ښځو لپاره د نړۍ تر ټولو بد هېواد بللی دی. په دغه راپور کې د نړۍ د ۱۸۸ هېوادونو وضعیت ارزول شوی او افغانستان د جدول په تر ټولو ټیټه درجه کې ځای لري

د راپور له مخې، له افغانستان وروسته هېوادونه لکه یمن، د افریقا مرکزي جمهوریت، سوریه، سوډان، هایټي او برونډي د ښځو لپاره د بد وضعیت لرونکي هېوادونو په لېست کې راغلي دي

د ارزونې مهم معیارونه

په دې نړیوال راپور کې د ښځو وضعیت له بېلابېلو اړخونو ارزول شوی، چې پکې امنیت، عدالت ته لاسرسی، ټولنیز او اقتصادي مشارکت، او پر ښځو د تاوتریخوالي کچه شاملې دي. څېړنه ښيي، چې په دغو هېوادونو کې ښځې له جدي محدودیتونو، ناامنۍ او سیستماتیک تبعیض سره مخ دي

د راپور موندنې ښيي، چې د تېر یو کال په موده کې، د هغو هېوادونو په ډله کې چې د ښځو لپاره تر ټولو بد وضعیت لري ـ د افغانستان په ګډون ـ له هر پنځو ښځو یوه ښځه په خپل کور کې له تاوتریخوالي سره مخ شوې ده. دا شمېره د ښځو پر وړاندې د تاوتریخوالي د پراخوالي او ژورتیا څرګندونه کوي

د افغانستان وضعیت

راپور ټینګار کوي، چې په افغانستان کې د ښځو پر ژوند سخت محدودیتونه لګول شوي، چې له امله یې ښځې له زده‌کړو، کار، ټولنیز فعالیت او بنسټیزو حقونو څخه بې‌برخې شوې دي. د عدالت سیسټم ته د ښځو نه‌لاسرسی او د تاوتریخوالي پر وړاندې د قانوني ملاتړ نشتوالی، د ښځو وضعیت لا پسې خراب کړی دی

نړیوال غبرګون

نړیوالو بشري حقونو بنسټونو د راپور له خپرېدو وروسته اندېښنه څرګنده کړې او ویلي یې دي، چې د افغانستان د ښځو وضعیت بیړني نړیوال پام ته اړتیا لري. دغو بنسټونو له نړیوالې ټولنې غوښتي، چې د افغان ښځو د حقونو د ساتنې، د تاوتریخوالي د مخنیوي او د بنسټیزو ازادیو د اعادې لپاره جدي او عملي ګامونه واخلي.

راپور پایله اخلي، که چېرې د ښځو پر وړاندې روان محدودیتونه او تاوتریخوالی دوام وکړي، نو نه یوازې د ښځو راتلونکی، بلکې د ټول افغانستان ټولنیز او اقتصادي ثبات به له لا ستر ګواښ سره مخ شي