مقاله

د قطر لومړی وزیر: د طالبانو او پاکستان ۱۳ ورځنۍ جګړه د سیمې ثبات ته لوی ګواښ دی

اشتراک گذاری:

بریانیوز:(سه شنبه،۱۹حوت۱۴۰۴)

د محمد بن عبدالرحمن آل ثاني، د قطر لومړي وزیر او د بهرنیو چارو وزیر، ویلي چې د طالبانو او پاکستان ترمنځ ۱۳ ورځنۍ جګړه د سیمې د سولې او ثبات لپاره جدي ګواښ بلل کېږي

هغه په خپلو څرګندونو کې ټینګار کړی چې د جګړې دوام نه یوازې د دواړو لورو ترمنځ کړکېچ زیاتوي، بلکې د ټولې سیمې امنیتي حالت هم اغېزمنولای شي. د هغه په وینا، هر ډول پوځي شخړه کولی شي د خلکو ژوند له سختو ستونزو سره مخ کړي او د بې‌ثباتۍ لړۍ نوره هم وغځوي

د قطر لومړي وزیر پر دواړو لورو غږ کړی چې د زور، جګړې او پوځي فشار پر ځای د خبرو، تفاهم او ډیپلوماسۍ لاره خپله کړي. هغه ویلي چې د شخړو د حل تر ټولو اغېزمنه او دوامداره لاره سیاسي خبرې او متقابل درناوی دی.

نوموړي همدارنګه زیاته کړې چې د سیمې هېوادونه باید د سولې او ثبات د ټینګښت لپاره ګډې هڅې وکړي، ځکه چې د یوې شخړې پراخېدل کولی شي د ټوله سیمې پر امنیت او اقتصاد ناوړه اغېزې ولري

شنونکي وايي چې د قطر دا څرګندونې په داسې وخت کې کېږي چې د طالبانو او پاکستان ترمنځ تاوتریخوالی زیات شوی او د سیمې ګڼ هېوادونه د دې وضعیت د لا خرابېدو په اړه اندېښنه لري. دوی باور لري چې د خبرو اترو پیل کولی شي د شخړې د کمېدو او د سولې د رامنځته کېدو لپاره مهم ګام وي