په ملګرو ملتونو کې د پاکستان استازي هند په افغانستان کې په لاسوهنې تورن کړ

په ملګرو ملتونو کې د پاکستان استازي هند په افغانستان کې په لاسوهنې تورن کړ

بریانیوز:(چهارشنبه،۲۰ حوت۱۴۰۴)

په ملګرو ملتونو کې د پاکستان استازي په خپلو وروستیو څرګندونو کې هند تورن کړی چې په افغانستان کې اخلالګري او د بې‌ثباتۍ هڅې کوي. د پاکستان استازي وویل چې د هند ځینې کړنې د سیمې امنیت ته زیان رسوي او د ترهګرو ډلو د ملاتړ له لارې د ناامنۍ د زیاتېدو لامل ګرځي

د پاکستان د استازي په وینا، د دغه هېواد امنیتي ځواکونه چې کوم پوځي عملیات ترسره کوي، هغه د خپل هېواد د امنیت د ساتنې لپاره دي. نوموړي ټینګار وکړ چې پاکستان د ترهګرۍ پر ضد مبارزه کوي او د هر ډول ګواښ په وړاندې به خپل دفاعي اقدامات جاري وساتي

پاکستان دا ادعا هم وکړه چې ځینې وسلوالې ډلې د افغانستان له خاورې څخه د پاکستان پر ضد بریدونه ترسره کوي، او دا وضعیت د سیمې د ثبات لپاره جدي اندېښنه بلل کېږي. د اسلام‌اباد په وینا، نړیواله ټولنه باید د دې موضوع په اړه جدي پاملرنه وکړي او د ترهګرۍ پر ضد ګډ اقدامات وکړي

بل لور ته د افغانستان اوسني واکمنان، چې د طالبان په نوم پېژندل کېږي، د پاکستان دا ادعاوې تل رد کړې دي. طالبانو څو ځله ویلي چې د افغانستان خاوره د هېڅ هېواد پر ضد نه کارول کېږي او دوی د ګاونډیو هېوادونو په کورنیو چارو کې لاسوهنه نه کوي

طالبانو د پاکستان وروستۍ څرګندونې هم رد کړې او ویلي یې دي چې پاکستان باید خپلې کورنۍ ستونزې د افغانستان پر غاړه وانچوي. د دوی په وینا، د پاکستان امنیتي ستونزې د دغه هېواد داخلي مسایل دي او باید په خپله یې حل کړي

سیاسي شنونکي باور لري چې د افغانستان او پاکستان تر منځ د امنیتي تورونو تبادله نوې نه ده، او دواړه لوري وخت ناوخت یو بل د ناامنۍ په رامنځته کولو تورنوي. دوی وایي چې د سیمې ثبات لپاره اړینه ده چې د خبرو او ډیپلوماسۍ له لارې ستونزې حل شي

کارپوهان ټینګار کوي چې که د سیمې هېوادونه په ګډه د باور فضا رامنځته نه کړي، نو د تورونو دا لړۍ به دوام وکړي او د سیمې پر امنیت به منفي اغېزې پرېږدي