بیجینګ –چین د افغانستان او پاکستان ترمنځ د کړکېچ د کمولو لپاره د منځګړیتوب هڅې پیل کړې

بیجینګ –چین د افغانستان او پاکستان ترمنځ د کړکېچ د کمولو لپاره د منځګړیتوب هڅې پیل کړې

(سه شنبه،۲۶حوت۱۴۰۴)بریا نیوز

 د چین حکومت اعلان کړی چې د افغانستان او پاکستان ترمنځ د وروستیو تاوتریخوالو له زیاتېدو وروسته یې د دواړو ګاونډیو هېوادونو ترمنځ د کړکېچ د کمولو لپاره ډیپلوماتیکې هڅې پیل کړې دي

د چین د بهرنیو چارو وزارت ویاند، لېن جیان، په یوه خبري ناسته کې ویلي چې د سیمې ثبات د ټولو هېوادونو په ګټه دی او بیجینګ هڅه کوي چې د تاوتریخوالي د پراخېدو مخه ونیسي. نوموړي ټینګار وکړ چې تر ټولو مهمه خبره دا ده چې دواړه لوري له جګړې ډډه وکړي او د خبرو اترو له لارې خپلې ستونزې حل کړي

لېن جیان زیاته کړه: «موږ هیله لرو چې افغانستان او پاکستان ژر تر ژره اوربند ته ورسېږي او د اختلافاتو د حل لپاره د خبرو مېز ته کښېني.» هغه وویل چې چین چمتو دی د دواړو هېوادونو ترمنځ د باور فضا رامنځته کولو کې مرسته وکړي

د وروستیو راپورونو له مخې، د افغانستان او پاکستان ترمنځ پر پوله نښتې زیاتې شوې دي، چې له امله یې دواړو خواوو ته مالي او ځاني زیانونه اوښتي دي. شنونکي وايي چې که دا وضعیت دوام وکړي، نو ښايي د سیمې امنیت ته جدي ګواښ پېښ کړي

چین، چې د سیمې له مهمو اقتصادي او سیاسي لوبغاړو څخه شمېرل کېږي، مخکې هم د سیمې د شخړو په حل کې رول لوبولی دی. کارپوهان باور لري چې د بیجینګ منځګړیتوب ښايي د دواړو هېوادونو ترمنځ د کړکېچ په کمولو کې اغېزناک تمام شي

په همدې حال کې، نړیواله ټولنه هم پر افغانستان او پاکستان غږ کوي چې له زغم کار واخلي او د تاوتریخوالي پر ځای سوله‌ ییزې لارې غوره کړي، څو د سیمې ثبات او امنیت خوندي پاتې شي