د ایرلنډ نوې بشري مرسته؛ افغانستان ته د میلیونونو یورو د مرستو اعلان

اشتراک گذاری:

بریا نیوز (سه شنبه ،۵جوزا، ۱۴۰۵)

د ملګرو ملتونو د بشري مرستو د همغږۍ ادارې «اوچا» اعلان کړی چې ایرلنډ د افغانستان د بشري مرستو له صندوق سره د ۳ میلیونه یورو، چې نږدې ۳.۴۴ میلیونه ډالره کېږي، مرسته کړې ده

اوچا پر خپلې اېکس پاڼې لیکلي، دغه مالي مرسته به په افغانستان کې د بشري مرستو د پیاوړتیا، د بېړنیو اړتیاوو د پوره کولو او اړمنو کورنیو ته د مرستو د رسولو لپاره وکارول شي

د ملګرو ملتونو د شمېرو له مخې، افغانستان لا هم له سخت بشري ناورین سره مخ دی او میلیونونه خلک د خوړو، روغتیايي خدمتونو او لومړنیو اړتیاوو د کمښت له ګواښ سره ژوند کوي. د ژمي له تېرېدو وروسته هم په ګڼو سیمو کې زرګونه کورنۍ د بېوزلۍ، وچکالۍ او اقتصادي ستونزو له امله مرستو ته اړتیا لري

شنونکي وایي، د ایرلنډ دا تازه مرسته په داسې وخت کې ترسره کېږي چې نړیوال بنسټونه د افغانستان د بشري وضعیت په اړه اندېښنه ښيي او د مرستندویه بودجې د کمېدو خبرداری ورکوي. د دوی په اند، دا ډول مرستې کولای شي د زرګونو اړمنو کورنیو لپاره د هیلې څرک شي او د بشري ناورین د ژورېدو مخه تر یوه بریده ونیسي

اوچا ټینګار کړی چې نړیوال ملاتړ لا هم د افغانستان لپاره حیاتي ارزښت لري او د بشري مرستو دوام د میلیونونو خلکو د ژوند د ژغورلو لپاره اړین دی