د روسیې درملیز شرکت افغانستان ته د درملو صادرات پیلوي

د روسیې درملیز شرکت افغانستان ته د درملو صادرات پیلوي

بریا نیوز (سه شنبه ،۵جوزا، ۱۴۰۵)

د روسیې مشهور درملیز شرکت «فارما سینتز» اعلان کړی چې په نږدې راتلونکې کې به افغانستان ته د خپلو درملو صادرات پیل کړي؛ هغه ګام چې د روسیې د یوه درملیز شرکت لومړنی رسمي ننوتل د افغانستان بازار ته بلل کېږي

د روسیې د «کومرسانت» ورځپاڼې د راپور له مخې، دغه شرکت د طالبانو تر ادارې لاندې د عامې روغتیا وزارت سره هوکړې ته رسېدلی او ټاکل شوې ده چې د درملو لومړنۍ جوپه په راتلونکو دوو میاشتو کې د افغانستان بازارونو ته ورسېږي 

راپورونه وایي، دا اقدام په داسې وخت کې ترسره کېږي چې افغانستان لا هم د روغتیايي خدمتونو او معیاري درملو له کمښت سره مخ دی او ګڼ ناروغان د درملنې لپاره له سختو ستونزو سره لاس او ګرېوان دي

شنونکي باور لري چې د روسي درملو بازار ته داخلېدل کولای شي د افغانستان د روغتیايي سکټور لپاره نوی بدلون رامنځته کړي، ځکه د درملو د کمښت او لوړو بیو ستونزه لا هم د خلکو له مهمو اندېښنو څخه ګڼل کېږي

د اقتصادي چارو کتونکي وایي، که دغه هوکړه په بریالۍ توګه عملي شي، نو دا به د افغانستان او روسیې ترمنځ د سوداګریزو اړیکو د پراختیا لپاره هم نوې دروازې پرانیزي او ښايي په راتلونکې کې نور روسي شرکتونه هم د افغانستان بازار ته مخه کړي

تر اوسه د هغو درملو د ډولونو او بیو په اړه بشپړ جزیات نه دي خپاره شوي، خو تمه ده چې راتلونکې اوونۍ به په دې تړاو نور معلومات هم شریک شي