مقاله

روغتیا نړیوال سازمان: د کانګو په دیموکراتیک جمهوریت کې د ایبولا پېښې ۳۲۱ ته رسېدلې دي

اشتراک گذاری:

بریانیوز( چهارشنبه، ۱۲ جوزا ١٤٠٥)

د روغتیا نړیوال سازمان اعلان کړی چې د کانګو په دیموکراتیک جمهوریت کې د ایبولا ناروغۍ د ثبت شویو پېښو شمېر ۳۲۱ ته رسېدلی، په داسې حال کې چې د دغې ناروغۍ ۱۱۶ شکمنې پېښې هم ثبت شوې دي

د رویټرز د راپور له مخې، د روغتیا نړیوال سازمان ویلي چې تر اوسه د ایبولا له امله ۴۸ کسان مړه شوي دي، خو شپږ ناروغان له درملنې وروسته روغ شوي او بېرته عادي ژوند ته ستانه شوي دي

روغتیايي چارواکو ویلي چې د ناروغۍ د خپرېدو د مخنیوي لپاره د څارنې، معاینې او درملنې چارې روانې دي او روغتیايي ډلې هڅه کوي چې د احتمالي نورو پېښو مخه ونیسي

ایبولا یوه خطرناکه ساري ناروغي ده چې د انسانانو ترمنځ د نېغ تماس له لارې خپرېږي او د چټک تشخیص او درملنې نشتوالی یې د مړینې کچه لوړه کولی شي

د روغتیا نړیوال سازمان اندېښنه ښودلې چې د شکمنو پېښو زیاتوالی ښایي د ناروغۍ د پراخېدو خطر زیات کړي، له همدې امله یې د مخنیوي او چټک غبرګون پر اړتیا ټینګار کړی دی

شنونکي وایي، د کانګو دیموکراتیک جمهوریت له پخوا راهیسې د ایبولا له پرله‌پسې خپرېدو سره مخ دی او هره نوې څپه یې د هېواد پر روغتیايي نظام او ټولنیزو چارو دروند اغېز پرېږدي