اقتصاد

کانونو او پټرولیم وزارت : د تخار د سرو زرو د دوو کانونو د ایستلو تړون لاسلیک شو

اشتراک گذاری:

بریانیوز - دوشنبه، ١۵ سرطان ١٤٠٥

د کانونو او پټرولیم وزارت وایي، د تخار ولایت د چاه‌آب ولسوالۍ د شول درې او وارچي سیمو د رسوبي سرو زرو د کانونو د ایستلو تړون له عبدالحمید فیضي د کانونو د ایستلو او پروسس له شرکت سره لاسلیک شوی دی

د وزارت د څرګندونو له مخې، د دغه تړون ټولیز ارزښت ۸۹ میلیونه او ۶۴ زره امریکایي ډالره دی. تړون د لسو کلونو لپاره شوی او اسلامي امارت به د کان د عوایدو څلوېښت سلنه امتیازي ونډه ترلاسه کوي

د کانونو او پټرولیم وزیر هدایت الله بدري ویلي، قراردادي شرکت مکلف دی چې خپلې ټولې چارې د کانونو د قانون، اړوندو کړنلارو او په تړون کې د ثبت شویو ژمنو له مخې ترسره کړي

د وزارت د معلوماتو له مخې، قراردادي شرکت به د امتیازي ونډې تر ورکړې سربېره د ټولنیزو خدمتونو په برخه کې هم دوه میلیونه امریکایي ډالره پانګونه وکړي

وزارت زیاتوي، تمه ده چې د دې پروژې په پلي کېدو سره به شاوخوا درې زره کسانو ته نېغ په نېغه او څلور زره نورو ته په نانېغ ډول د کار زمینه برابره شي، چې د سیمې په اقتصادي وده او د خلکو په کارموندنه کې به مهمه ونډه ولري