سیاست

آلمان: د افغان استازولیو همکاري د افغان وګړو د بېرته ستنولو لپاره اړینه ده

اشتراک گذاری:

بریانیوز - دوشنبه، ١۵ سرطان ١٤٠٥

د آلمان د کورنیو چارو وزارت ویلي، په دغه هېواد کې د افغانستان د ډیپلوماټیکو استازولیو د چارو دوام د هغو افغان وګړو د بېرته ستنولو د بهیر لپاره مهم او اړین دی چې د استوګنې قانوني اجازه نه لري

د وزارت په وینا، افغان استازولۍ د بېرته ستنېدونکو کسانو لپاره اړین سفري اسناد برابروي او د دغو اسنادو له چمتو کېدو پرته د ایستلو قانوني بهیر له خنډونو سره مخ کېږي. چارواکي ټینګار کوي چې د هویت د تثبیت او د سفري سندونو د برابرولو بهیر د هرې بېرته ستنېدنې اساسي برخه ده

د آلمان حکومت وایي، د کډوالۍ د قوانینو پلي کول د دولت له لومړیتوبونو څخه دي او هغه کسان چې د استوګنې قانوني حق نه لري، باید د قانون له مخې خپل هېواد ته ستانه شي. د همدې موخې لپاره د افغانستان د استازولیو همکاري د عملي ګامونو د ترسره کېدو لپاره مهمه بلل کېږي

دغه څرګندونې په داسې مهال کېږي چې آلمان په وروستیو میاشتو کې د ناقانونه کډوالۍ د مخنیوي او د هغو بهرنیو وګړو د بېرته ستنولو هڅې زیاتې کړې دي چې د پناه غوښتنې دوسیې یې رد شوې یا د استوګنې قانوني اجازه نه لري

د آلمان د کورنیو چارو وزارت په باور، د افغان استازولیو له لوري د سفري اسنادو صادرول د بېرته ستنېدنې بهیر چټکوي او د قانوني کړنلارې په بشپړېدو کې مهمه ونډه لري