مقاله

د هانا بنسټ: په ایران کې افغان کډوال له قانوني او اداري خنډونو سره مخ دي

اشتراک گذاری:

بریانیوز - دوشنبه، ١۵ سرطان ١٤٠٥

د هانا د بشري حقونو بنسټ په خپل تازه راپور کې ویلي، په ایران کې مېشت افغان کډوال، په ځانګړي ډول ښځې او ماشومان، د ودونو، زېږونونو، بېلتونونو او نورو مدني سندونو د ثبتولو په برخه کې له پراخو ستونزو سره مخ دي. د راپور له مخې، دغو کډوالو ته د محکمو، قانوني مرستو او اداري خدمتونو لاسرسی هم له ګڼو خنډونو سره مل دی

راپور زیاتوي، د وروستیو نښتو له امله د امنیتي تدابیرو سختېدو، د انټرنېټ پرې کېدو، په عامه خدمتونو کې د ګډوډۍ او د اداري فشارونو له زیاتېدو وروسته د افغان کډوالو وضعیت لا پسې ستونزمن شوی دی. د هانا په وینا، دغو بدلونونو د ګڼو افغانانو لاسرسی عدالت، بنسټیزو خدمتونو او خپلو قانوني حقونو ته لا محدود کړی دی
د یاد بنسټ په اند، ښځې او ماشومان د دغو ستونزو تر ټولو ډېر اغېزمن شوي او د قانوني اسنادو نشتون یې د زده کړو، روغتیايي خدمتونو او نورو لومړنیو اړتیاوو په ترلاسه کولو کې هم ستونزې زیاتې کړې دي

هانا د ایران له چارواکو غوښتي چې د افغان کډوالو د مدني اسنادو د ثبت بهیر اسانه کړي، د ښځو او ماشومانو د حقونو د خونديتوب لپاره اغېزمن ګامونه واخلي او له هغو کړنو ډډه وکړي چې د کډوالو لاسرسی عدلي، قضایي او اداري ادارو ته محدودوي