مقاله

حماس: په غزه کې مو حکومت منحل کړ، واک د فلسطیني متخصصانو ادارې ته سپارو

اشتراک گذاری:

بریانیوز - سه شنبه، ١۶ سرطان ١٤٠٥

د غورځنګ اعلان کړی چې په غزه تړانګه کې یې خپل شاوخوا لس کلن حکومت منحل کړی او چمتو دی چې د سیمې اداري چارې د فلسطیني متخصصانو او خپلواکو کارپوهانو یوې ادارې ته وسپاري

د راپورونو له مخې، حماس ویلي چې دا پرېکړه د غزې د راتلونکي ادارې لپاره د یوې نوې طرحې په چوکاټ کې شوې او موخه یې د جګړې له پای وروسته د ملکي ادارو د فعالیتونو تنظیم او د خلکو د ورځنیو اړتیاوو پوره کول دي

حماس زیاته کړې چې د اداري واک له سپارلو سره سره به د هغو سیمو امنیت ته دوام ورکړي چې د امریکا په منځګړیتوب له اسراییل سره د اوربند له هوکړې وروسته لا هم د دغه غورځنګ تر نفوذ لاندې دي. د غورځنګ په وینا، د امنیت ساتنه او د عامه نظم ټینګښت به د دوی له لومړیتوبونو څخه وي

دغه اعلان په داسې وخت کې کېږي چې د غزې د جګړې د پای، د سیمې د راتلونکي سیاسي جوړښت او د واک د لېږد په اړه سیمه‌ییز او نړیوال بحثونه روان دي. د فلسطیني ډلو او نړیوالو لورو ترمنځ د غزې د راتلونکي ادارې په اړه بېلابېل وړاندیزونه مطرح شوي، خو تر اوسه وروستۍ هوکړه نه ده شوې

تر اوسه د اسراییل، فلسطیني ادارې او نورو نړیوالو لورو له خوا د حماس د دې پرېکړې په اړه رسمي غبرګون نه دی خپور شوی، خو تمه کېږي چې دا اعلان به د غزې د راتلونکي سیاسي وضعیت او د سولې د روانو هڅو په اړه نوي بحثونه را وپاروي