سپاهیان میهن څوک دي؟؛ په بدخشان کې د یوې نوې وسله‌والې ډلې راڅرګندېدل

سپاهیان میهن څوک دي؟؛ په بدخشان کې د یوې نوې وسله‌ والې ډلې راڅرګندېدل

بریانیوز - جمعه ٢۶ سرطان ١٤٠٥

بدخشان – «سپاهیان میهن» یوه نوې وسله‌ واله ډله ده چې په دې وروستیو کې یې د بدخشان ولایت د یفتل سفلي ولسوالۍ د نیولو ادعا کړې او د لومړي ځل لپاره یې د خپل فعالیت خبر ورکړی دی

دغه ډله ادعا کوي چې د یفتل سفلي ولسوالۍ پر مرکز یې ناڅاپي برید کړی، د طالبانو ځواکونه یې بې‌وسلې کړي او د لنډ وخت لپاره یې د ولسوالۍ کنټرول په لاس کې اخیستی دی

تر اوسه د «سپاهیان میهن» د جوړښت، مشرانو، د غړو شمېر او د فعالیت د سیمو په اړه ډېر معلومات نه دي خپاره شوي. همداراز لا هم روښانه نه ده چې دغه ډله د چا له لوري ملاتړ کېږي او له نورو مخالفو ډلو سره کومې اړیکې لري که نه

د دې ډلې په خپرو شویو ویډیوګانو کې یو شمېر وسله‌وال کسان ښکاري چې ځانونه د «سپاهیان میهن» غړي معرفي کوي او وایي چې د طالبانو پر ضد مبارزه کوي

د دې ډلې مشران او قوماندانان تر اوسه رسنیو ته نه دي معرفي شوي او هېڅ پېژندل شوي سیاسي یا پوځي شخصیت د دې ډلې مشري نه ده منلې

د یفتل سفلي ولسوالۍ د سقوط او د طالبانو د ځواکونو د بې‌وسلې کېدو ادعاوې تر اوسه په خپلواکه توګه نه دي تایید شوې. طالبانو هم د دې پېښې په اړه رسمي غبرګون نه دی ښودلی

د «سپاهیان میهن» راڅرګندېدل په داسې مهال دي چې په افغانستان کې د طالبانو له واکمنېدو وروسته یو شمېر وسله‌والو خوځښتونو د هغوی پر ضد د فعالیت اعلانونه کړي، خو ډېری یې د امکاناتو او پراخ سازماني جوړښت له کمښت سره مخ دي