ایران پر طالبانو د فشار نوې جبهه پرانیزي؛ د مزارشریف د دیپلوماتانو د وژنې دوسیه بیا راپورته شوه

د ایران د بهرنیو چارو وزارت د مزارشریف په ښار کې د دغه هېواد د قونسلګرۍ د برید د ۲۸مې کلیزې په مناسبت یو ځل بیا د دغې پېښې د «عاملانو او امر کوونکو» د پېژندلو او د عدالت د ټینګښت غوښتنه کړې ده.

بریانیوز- شنبه ١٧ اسد ١٤٠٥

۲۸ کاله وړاندې، د ۱۳۷۷ لمریز کال د زمري پر ۱۷مه، د طالبانو له لوري د مزارشریف له نیولو وروسته، د ایران په قونسلګرۍ کې اته ایراني دیپلوماتان او د ایران د دولتي خبري اژانس «ایرنا» خبریال محمود صارمي ووژل شول.

د وژل شویو ایراني دیپلوماتانو نومونه ناصر ریګي، مجید نوري نیارکي، محمدناصر ناصري، کریم حیدریان، محمدعلي قیاسي، رشید پاریوفلاح، نورالله نوروزي او حیدرعلي باقري ښودل شوي دي.

د ایران د بهرنیو چارو وزارت د شنبې په ورځ، د زمري پر ۱۷مه، په یوه اعلامیه کې دغه پېښه «شنیع جنایت» او د دیپلوماتیکو او قونسلي حقونو ښکاره سرغړونه بللې ده.

دغه وزارت ویلي چې د وخت تېرېدل نه شي کولای د دې پېښې اهمیت کم کړي او ټینګار یې کړی چې د پېښې د «مبهمو» اړخونو په روښانه کولو، د عاملانو او امر کوونکو په پېژندلو او د هغوی په وړاندې د عدالت په پلي کېدو کې باید جدي اقدامات وشي.

د ایران د بهرنیو چارو وزارت په خپله اعلامیه کې د طالبانو نوم په مستقیم ډول نه دی یاد کړی، خو ویلي یې دي چې تهران به د دې موضوع د تعقیب لپاره له هر ډول فرصت او امکان څخه استفاده وکړي.

ایران هغه مهال طالبان د خپلو دیپلوماتانو او خبریال د وژنې مسوول بللي وو؛ خو طالبانو دغه تور رد کړی او ادعا یې کړې وه چې په دې پېښه کې «خپل‌سري ځواکونو» لاس درلود.

د مزارشریف د قونسلګرۍ دغه پېښه د ایران او طالبانو ترمنځ د اړیکو له تر ټولو جدي بحرانونو څخه ګڼل کېږي، چې له امله یې د دواړو لورو ترمنځ ترینګلتیا زیاته شوه.

ایران له هغې وروسته په بېلابېلو مواردو کې د دې پېښې د بشپړې څېړنې، د عاملانو د پېژندلو او د هغوی د محاکمې غوښتنه کړې ده.

د ایران د بهرنیو چارو وزارت په ۱۴۰۳ کال کې هم له طالبانو غوښتي وو چې د دغې پېښې د عاملانو په اړه د خپلو څېړنو پایلې اعلان او له مسوولینو سره قانوني چلند وکړي.