اخبار جهان

دمشق : سوریه او روسیه د حمیمیم او طرطوس پوځي اډو پر سر هوکړې ته ورسېدل

اشتراک گذاری:

بریانیوز/ سه شنبه ( ۲۰ / اسد /۱۴۰۵هـ.ش)

سوریې له روسیې سره له شاوخوا ۱۸ میاشتو خبرو اترو وروسته د خپلې خاورې دننه د روسیې د دوو مهمو پوځي اډو، حمیمیم او طرطوس، د راتلونکي وضعیت په اړه هوکړه کړې ده

د سوریې د بهرنیو چارو وزیر ویلي، د هوکړې له مخې به د حمیمیم او طرطوس په اډو کې ملکي تاسیسات د سوریې تر واک لاندې وي، خو په پوځي برخو کې به د روسي او سوریایي ځواکونو ګډې روزنې او پوځي فعالیتونه دوام ولري

د هوکړې له مخې، د حمیمیم هوايي ډګر او د طرطوس اړوند سوداګریز بندر به هم د سوریې ادارې ته وسپارل شي؛ خو روسي ځواکونه به په دغو سیمو کې خپل حضور ته دوام ورکړي

د سوریې حکومت ویلي چې د روسي ځواکونو پاتې کېدل به د دواړو هېوادونو د دفاعي او امنیتي همکاریو په چوکاټ کې تنظیمېږي

د حمیمیم هوايي اډه او د طرطوس سمندري اډه د سوریې په کورنۍ جګړه کې د روسیې لپاره ستراتیژیک اهمیت لري. د روسیې پوځي حضور په سوریه کې د پخواني ولسمشر بشار الاسد د واکمنۍ پر مهال پراخ شو او مسکو د دمشق د حکومت له مهمو پوځي ملاتړو څخه و

د دواړو اډو په اړه نوې هوکړه په داسې حال کې شوې چې سوریه هڅه کوي له روسیې سره خپلې اړیکې وساتي، خو په ورته وخت کې د هېواد پر مهمو پوځي او اقتصادي تاسیساتو خپل حاکمیت هم پیاوړی کړي