سیاست

پزشکیان: افغانستان او پاکستان ایران ته د بهرنیو عناصرو د ننوتلو مخه نیولې

اشتراک گذاری:

بریانیوز/ سه شنبه ( ۲۰ / اسد /۱۴۰۵هـ.ش)

تهران – د ایران ولسمشر مسعود پزشکیان وايي، افغانستان او پاکستان ایران ته د هغو بهرنیو عناصرو د ننوتلو په مخنیوي کې مهم رول لوبولی چې غوښتل یې په دغه هېواد کې بې‌ثباتي او ګډوډي رامنځته کړي

پزشکیان ویلي، د ایران ګاونډیو هېوادونو د وضعیت د کنټرول لپاره جدي اقدامات کړي او د هغو کسانو پر وړاندې یې لازم ګامونه اخیستي چې د نوموړي په وینا، غوښتل یې په ایران کې ناامني رامنځته کړي

د ایران ولسمشر زیاته کړې چې کابل او اسلام‌اباد د خپلو پولو په اوږدو کې ځواکونه ځای پر ځای کړي وو، څو د وضعیت د لا خرابېدو او د ناامنه کوونکو ډلو د تګ راتګ مخه ونیسي

نوموړي د سیمې له حکومتونو او خلکو څخه د همکارۍ له امله مننه کړې او ویلي یې دي چې د ګډو هڅو له لارې د هغو ډلو هڅې شنډې شوې چې غوښتل یې په سیمه کې امنیت ګډوډ کړي

پزشکیان ټینګار کړی چې د ګاونډیو هېوادونو همکاري د سیمې د امنیت او ثبات لپاره مهمه ده او د ګډو امنیتي ګواښونو د مخنیوي لپاره د هېوادونو ترمنځ همغږي باید دوام ولري