حزب اسلامي: د افغانستان د بحران د حل لپاره دې د «ملي یووالي میثاق» عملي شي

اشتراک گذاری:

بریانیوز/ سه شنبه ( ۲۰ / اسد /۱۴۰۵هـ.ش)

د ګلبدین حکمتیار په مشرۍ حزب اسلامي د افغانستان د اوسني سیاسي بحران د حل لپاره د «ملي یووالي میثاق» په نوم د یوې نوې طرحې ملاتړ کړی دی

دغه طرحه د یو شمېر افغانانو له لوري وړاندې شوې چې موخه یې د واک د سوله‌ییز لېږد، د نوي سیاسي نظام جوړول او د هېواد د روان بحران لپاره د حل لارې موندل بلل شوې دي

په «ملي یووالي میثاق» کې د اوسني سیاسي وضعیت او د واک د انحصار په اړه اندېښنې مطرح شوې او غوښتنه شوې چې د افغانستان د راتلونکي حکومت برخلیک دې د ازادو او عادلانه ټاکنو له لارې وټاکل شي

د طرحې له مخې، د نوي حکومت تر جوړېدو مخکې د یوه کلن انتقالي حکومت د رامنځته کېدو وړاندیز شوی دی. د دې دورې له مهمو دندو څخه د نوي اساسي قانون جوړول، د سیاسي بهیر برابرول او د ټاکنو لپاره د زمینه برابرول یاد شوي دي

په طرحه کې ویل شوي چې که د افغانستان اوسني واکمنان د سیاسي حل لارې او خبرو اترو له لارې د بحران د هواري لپاره چمتو نه شي، نو ښايي د مدني نافرمانۍ او پراخو ولسي اعتراضونو له زیاتېدو سره مخ شي

حزب اسلامي ویلي چې د افغانستان د روان بحران د پای ته رسولو لپاره د زور پر ځای سیاسي تفاهم، ملي یووالی او د خلکو د ارادې درناوی اړین دی