سیاست

اسلام‌اباد : طالبانو مولانا فضل‌الرحمن ته کابل ته د سفر رسمي بلنه ورکړې

اشتراک گذاری:

بریانیوز/ پنجشنبه ( ۲۲ / اسد /۱۴۰۵هـ.ش)

په اسلام‌اباد کې د طالبانو سفیر سردار احمدجان شکیب د پاکستان د جمعیت علمای اسلام ګوند مشر مولانا فضل‌الرحمن ته کابل ته د سفر رسمي بلنه ورکړې ده

د فضل‌الرحمن د دفتر په وینا، نوموړي ته بلنه ورکړل شوې چې د طالبانو د واکمنۍ د پنځمې کلیزې په مناسبت په جوړېدونکو مراسمو کې ګډون وکړي

د راپورونو له مخې، د طالبانو سفیر او مولانا فضل‌الرحمن د لیدنې پر مهال د افغانستان او پاکستان پر اړیکو او سیمه‌ییز امنیت هم خبرې کړې دي

دا بلنه په داسې مهال ورکول کېږي چې د کابل او اسلام‌اباد اړیکې له سختو ترینګلتیاوو سره مخ دي. د دواړو هېوادونو ترمنځ د سرحدي امنیت، وسله‌والو ډلو او سوداګریزو لارو د بندېدو په اړه اختلافات په وروستیو میاشتو کې زیات شوي دي

فضل‌الرحمن په تېرو کلونو کې د طالبانو له واکمنېدو وروسته له کابل سره د اړیکو او خبرو ملاتړ کړی او څو ځله یې د افغانستان او پاکستان ترمنځ د اختلافاتو د سوله‌ییز حل غوښتنه کړې ده

د طالبانو له لوري د یوه بهرني سیاسي مشر د واکمنۍ د کلیزې مراسمو ته بلنه د کابل د بهرني تعامل په لړ کې یوه مهمه سیاسي اشاره بلل کېږي، په ځانګړي ډول داسې مهال چې طالبان هڅه کوي له سیمه‌ییزو هېوادونو سره خپلې اړیکې پراخې کړي