اخبار جهان

افغان کډوال : له ایران څخه د افغانانو جبري ستنېدا؛ ښځې او ماشومان له ګڼو ګواښونو سره مخ دي

اشتراک گذاری:

بریانیوز/ پنجشنبه ( ۲۲ / اسد /۱۴۰۵هـ.ش)

کابل – د افغان کډوالو له ایران څخه د جبري ستنېدو بهیر د ښځو او ماشومانو د وضعیت په اړه اندېښنې زیاتې کړې دي. د یوه بنسټ په نوي راپور کې خبرداری ورکړل شوی چې له ایران څخه ایستل شوي افغان ماشومان له ګڼو بشري او ټولنیزو ستونزو سره مخ کېدای شي

د اګست پر ۱۰مه خپور شوي راپور کې ویل شوي چې هغه ماشومان چې له ایران څخه افغانستان ته ستنېږي، ښايي له خپلو کورنیو څخه د بېلېدو، زده‌کړو ته د نه لاسرسي او د هویتي اسنادو د نشتوالي له ستونزو سره مخ شي

راپور زیاتوي چې د ستنېدونکو ماشومانو لپاره د ناوړه ګټې اخیستنې او استثمار خطر هم شته او ځینې ماشومان ښايي په ناامنو او نامناسبو شرایطو کې ژوند کولو ته اړ شي

د راپور له مخې، ښځې او ماشومان د جبري ستنېدو پر مهال د ځانګړو زیان‌پذیریو له امله لا زیاتې پاملرنې او خوندیتوب ته اړتیا لري

بنسټونو ټینګار کړی چې د ستنېدونکو افغانانو، په ځانګړي ډول د ښځو او ماشومانو، د خوندیتوب لپاره باید د هغوی د اړتیاوو مطابق بشري مرستې، روغتیايي خدمتونه، سرپناه او د زده‌کړو زمینه برابره شي

د افغان کډوالو جبري ستنېدل په داسې مهال دوام لري چې افغانستان له وړاندې له اقتصادي ستونزو، بې‌کارۍ او پراخ بشري بحران سره مخ دی، او د کډوالو د لوی شمېر بېرته ستنېدل د هېواد پر محدودو خدماتو لا ډېر فشار اچوي