یان ایګلنډ: افغانستان له ژور بشري، اقتصادي او اقلیمي ناورین سره مخ دی

اشتراک گذاری:

بریانیوز/ شنبه ( ۲۴ / اسد /۱۴۰۵هـ.ش)

د ناروې د کډوالو شورا عمومي منشي یان ایګلنډ وايي، افغانستان له یوه ژور بشري، اقتصادي او اقلیمي ناورین سره مخ دی او د مرستو د بودجې کمښت د میلیونونو اړمنو افغانانو وضعیت لا پسې خرابوي

ایګلنډ پر ناټو غړو هېوادونو نیوکه کړې چې د نوموړي په وینا، له افغان ولس سره یې خپلې اخلاقي ژمنې هېرې کړې دي

هغه ویلي، د نړیوالو مرستو د مالي سرچینو او بودجې کمښت د بشري مرستو د ادارو وړتیاوې په جدي توګه محدودې کړې دي. د نوموړي په وینا، همدې وضعیت مرستندویه بنسټونه اړ کړي چې د افغان بې‌ځایه شویو کورنیو لپاره خپلې حیاتي مرستې راکمې کړي

ایګلنډ خبرداری ورکړی چې د مرستو د کمېدو دوام به هغه کورنۍ لا زیانمنې کړي چې له مخکې د بې‌وزلۍ، بې‌ځایه کېدو او اقلیمي ستونزو له امله له سختو شرایطو سره مخ دي

د ناروې د کډوالو شورا عمومي منشي له نړیوالې ټولنې غوښتي چې د افغانستان بشري وضعیت له پامه ونه غورځوي او د افغانانو د ملاتړ لپاره خپلې مرستې او مالي ژمنې روانې وساتي

نوموړي ټینګار کړی چې د افغانستان اوسنی بحران یوازې د دغه هېواد ستونزه نه ده، بلکې نړیواله ټولنه هم باید د میلیونونو اړمنو افغانانو د ژوند د ژغورلو په برخه کې خپل مسؤلیت ادا کړي