مقاله

ازبکستان: افغانستان ته به د کورنیو اړتیاوو له پوره کېدو وروسته برېښنا صادر کړو

اشتراک گذاری:

بریانیوز/ شنبه ( ۲۴ / اسد /۱۴۰۵هـ.ش)

تاشکند – ازبکستان وايي، افغانستان ته د برېښنا صادرات به هغه مهال ترسره کوي چې د دغه هېواد کورنۍ اړتیاوې په بشپړ ډول پوره شي

د ازبکستان د انرژۍ وزیر شیرزاد خوجایف ویلي، افغانستان ته د صادرېدونکې برېښنا اندازه به د کورني مصرف له پوره کېدو وروسته د پاتې ظرفیت له مخې ټاکل کېږي

خوجایف زیاته کړې چې په هغو وختونو کې چې په ازبکستان کې د لمریزې او بادي برېښنا تولید زیات وي، د اضافي برېښنا یوه برخه به افغانستان ته صادره شي

بلخوا، د ازبکستان ولسمشر شوکت میرضیایف اړوندو ادارو ته لارښوونه کړې چې د سرخان‌دریا – پلخمري د برېښنا لېږد پروژې چارې چټکې کړي.

دغه پروژه د افغانستان د برېښنا شبکې د پیاوړتیا او له منځنۍ اسیا څخه د برېښنا د لېږد لپاره له مهمو پروژو څخه ګڼل کېږي

افغانستان اوسمهال د خپلې اړتیا وړ برېښنا لویه برخه له ګاونډیو هېوادونو واردوي. د معلوماتو له مخې، شاوخوا ۸۰ سلنه برېښنا یې له بهر څخه، په ځانګړي ډول له ازبکستان او نورو منځنۍ اسیا هېوادونو څخه، ترلاسه کېږي

د برېښنا پر وارداتو د افغانستان لوړه تکیه د دې هېواد لپاره د انرژۍ د امنیت موضوع مهمه کړې ده. د ازبکستان تازه څرګندونې ښيي چې د صادراتو دوام به تر ډېره د دغه هېواد د کورني مصرف، تولید او اضافي ظرفیت پورې تړلی وي