اخبار جهان

نصیر احمد فایق :۵۶ هېوادونو د افغان ښځو او نجونو پر وړاندې د طالبانو د سیاستونو په اړه اندېښنه څرګنده کړه

اشتراک گذاری:

بریانیوز/ شنبه ( ۲۴ / اسد /۱۴۰۵هـ.ش)

نیویارک – په ملګرو ملتونو کې د افغانستان د استازولۍ سرپرست نصیر احمد فایق د ۵۶ هېوادونو په ګډه اعلامیه کې د طالبانو تر واکمنۍ لاندې د افغان ښځو او نجونو د وضعیت په اړه جدي اندېښنه څرګنده کړې ده

په اعلامیه کې د ښځو او نجونو پر وړاندې د «سیستماتیکې ځپنې او تبعیضي سیاستونو» د پای ته رسېدو غوښتنه شوې او ټینګار شوی چې افغان نجونو ته باید د زده‌کړو حق بېرته ورکړل شي

ګډه اعلامیه له طالبانو غواړي چې پر ښځو د کار لګېدلي محدودیتونه لغوه کړي او هغوی ته اجازه ورکړي چې په ټولنیز، اقتصادي او عامه ژوند کې خپل فعال حضور ولري

د ۵۶ هېوادونو په وینا، په افغانستان کې د ټولګډونه حکومت نشتوالی او روان بشري ناورین د بې‌ثباتۍ له مهمو عواملو څخه دي. دوی ټینګار کړی چې د افغانستان د راتلونکي لپاره باید د ټولو افغانانو د ګډون زمینه برابره شي

په اعلامیه کې همداراز غوښتنه شوې چې د افغانستان خاوره باید د هېڅ هېواد پر وړاندې د ترهګریزو بریدونو لپاره و نه کارول شي او د ترهګرۍ پر وړاندې د مبارزې په برخه کې باید نړیوالې اندېښنې جدي ونیول شي

طالبانو تر اوسه د ۵۶ هېوادونو د دې ګډې اعلامیې په اړه رسمي غبرګون نه دی ښودلی. د طالبانو حکومت بیا په تېرو مواردو کې د ښځو او نجونو په اړه نړیوالې نیوکې رد کړې او ویلي یې دي چې د ښځو حقوق د اسلامي شریعت په چوکاټ کې خوندي دي