سیاست

خلیلزاد: له افغانستانه د امریکا مخ اړول به جیوپولیټیکه تشه رامنځته کړي

اشتراک گذاری:

بریانیوز/دو شنبه ( ۲۶ / اسد /۱۴۰۵هـ.ش)

د افغانستان لپاره د امریکا پخوانی ځانګړی استازی زلمی خلیلزاد وايي، واشنګټن باید له کابل سره خپل تعاملات زیات کړي او د افغانستان له اوسني وضعیت څخه باید مخ وانه ړوي

خلیلزاد خبرداری ورکړی چې له افغانستان سره د اړیکو کمول او د دغه هېواد پرېښودل به یوه جیوپولیټیکه تشه رامنځته کړي؛ هغه تشه چې په وینا یې، د ترهګرو ډلو او د امریکا سیالانو لپاره به د فعالیتونو د پراخولو زمینه برابره کړي

نوموړي ټینګار کړی چې د افغانستان په اړه د امریکا فعاله ډیپلوماسي کولای شي د امنیتي ګواښونو د څارنې او د سیمه‌ییزو سیالیو د مدیریت لپاره د واشنګټن امکانات پیاوړي کړي

خلیلزاد دا څرګندونې په داسې مهال کوي چې د طالبانو له بیا واکمنېدو وروسته د افغانستان او امریکا اړیکې تر ډېره د محدودو دیپلوماتیکو او بشري تعاملاتو په کچه پاتې دي

د هغه په وینا، واشنګټن باید د افغانستان په اړه داسې تګلاره غوره کړي چې هم خپل امنیتي او جیوپولیټیک اهداف خوندي کړي او هم د سیمې د بدلېدونکي وضعیت له واقعیتونو سره همغږې وي