سیاست

د بریتانیا ځانګړی استازی: د افغانستان راتلونکی د افغانانو، سیمې او بریتانیا لپاره مهم دی

اشتراک گذاری:

بریانیوز/دو شنبه ( ۲۶ / اسد /۱۴۰۵هـ.ش)

د افغانستان لپاره د بریتانیا ځانګړي استازي ریچارد لیندسي ویلي، د افغانستان راتلونکی یوازې د افغانانو لپاره نه، بلکې د سیمې او بریتانیا لپاره هم ځانګړی اهمیت لري

لیندسي د طالبانو د بیا واکمنېدو د پنځمې کلیزې په مناسبت په خپله اېکس پاڼه کې د افغانستان لپاره د ځانګړي استازي په توګه د خپل تېر یوه کال د فعالیتونو په اړه څرګندونې کړې دي

نوموړي ویلي، لندن به له افغانستان سره خپلو اړیکو، د بېلابېلو لورو د نظرونو اورېدو او د افغان ولس د ملاتړ ته دوام ورکړي

لیندسي زیاته کړې چې کابل ته د خپلو سفرونو پر مهال یې د طالبانو له چارواکو سره د بریتانیا د لومړیتوبونو په اړه خبرې کړې دي

د بریتانیا ځانګړي استازي ټینګار کړی چې یوازې خبرې بسنه نه کوي، بلکې خبرې باید له عملي اقداماتو سره ملې وي

د هغه څرګندونې په داسې مهال کېږي چې بریتانیا، د نورو لوېدیځو هېوادونو په څېر، له طالبانو سره د رسمي پېژندنې له پرېکړې پرته د افغانستان په اړه محدود تعاملات روان ساتلي دي