اخبار جهان

بیجینګ : د افغانستان لپاره د چین ځانګړي استازي ترکیې، پاکستان او افغانستان ته سفر وکړ

اشتراک گذاری:

بریانیوز/دو شنبه ( ۲۶ / اسد /۱۴۰۵هـ.ش)

د افغانستان لپاره د چین د بهرنیو چارو وزارت ځانګړي استازي یو شیاویونګ د جولای له ۳۰مې تر اګست ۸مې پورې ترکیې، پاکستان او افغانستان ته سفر کړی او د سیمه‌ییزو اړیکو او د کابل او اسلام‌اباد ترمنځ د اړیکو د ښه کولو په اړه یې له چارواکو سره خبرې کړې دي

د چین د بهرنیو چارو وزارت ویلي، یو شیاویونګ په ترکیه کې د دغه هېواد د بهرنیو چارو وزارت د سویلي اسیا له عمومي رییس جهاد ارګینای سره لیدلي او د دواړو لورو د ګډو اندېښنو او سیمه‌ییزو موضوعاتو په اړه یې خبرې کړې دي

چین وايي، ځانګړي استازي د پاکستان او افغانستان د سفرونو پر مهال هم د دواړو هېوادونو له چارواکو سره د کابل او اسلام‌اباد ترمنځ د اړیکو د ښه والي او پراختیا پر لارو چارو بحث کړی دی

د چین بهرنیو چارو وزارت د دغو لیدنو او خبرو اترو په اړه نور جزیات نه دي ورکړي، خو د یو شیاویونګ سفر په داسې مهال ترسره شوی چې د افغانستان او پاکستان اړیکې د امنیتي، سیاسي او سرحدي اختلافاتو له امله له سختو ننګونو سره مخ دي

چین په وروستیو کلونو کې هڅه کړې چې د افغانستان او پاکستان ترمنځ د اړیکو په ښه کولو کې خپل دیپلوماتیک رول پیاوړی کړي. د بیجینګ په باور، د کابل او اسلام‌اباد ترمنځ ثبات د سیمې د امنیت، سوداګرۍ او اقتصادي همکاریو لپاره مهم دی